لاہور: (ملک ظہیر)انویسٹی گیشن پولیس گڑھی شاہو نے اندوہناک قتل کیس کا معمہ حل کرتے ہوئے مقتول کی بیوی اور اس کے آشنا کو گرفتار کر لیا ہے۔ ملزمان نے سوچے سمجھے منصوبے کے تحت شہری قاسم کو قتل کیا اور واردات کو ڈکیتی کا رنگ دینے کی ناکام کوشش کی۔
ایس پی انویسٹی گیشن خالد سعید نے صحافیوں کو قتل کی لرزہ خیز تفصیل سے آگاہ کرتے ہوئے بتایا کہ مقتول قاسم کی بیوی اور ملزم کے درمیان قریبی تعلقات تھے اور وہ شادی کرنا چاہتے تھے، جس کی راہ میں قاسم رکاوٹ تھا۔ جسے اپنے راستے سے ہٹانے کے لئے خاتون نے پہلے اپنے شوہر کو کھانے میں نیند کی گولیاں دیں، جب وہ بے ہوش ہو گیا تو اس کے آشنا نے گھر میں داخل ہو کر سوئے ہوئے قاسم پر فائرنگ کر کے اسے موت کے گھاٹ اتار دیا۔
قتل کے بعد ملزم گھر سے زیورات اور قیمتی سامان لے کر فرار ہو گیا تاکہ پولیس کو یہ تاثر دیا جا سکے کہ یہ مزاحمت پر ڈکیتی کا واقعہ ہے۔ تاہم پولیس نے جائے وقوعہ سے ملنے والے سائنسی شواہد اور سی سی ٹی وی کیمروں کی مدد سے تفتیش کا دائرہ کار بڑھایا۔ خاتون کے بیانات میں تضاد اور شک کی بنیاد پر جب تفتیش کی گئی تو اس نے اپنے جرم کا اعتراف کر لیا۔ پولیس نے بروقت کارروائی کرتے ہوئے خاتون اور اس کے ساتھی کو گرفتار کر کے آلہ قتل اور مسروقہ سامان برآمد کر لیا ہے۔