مری: مسلم لیگ (ن) کے صدر میاں محمد نواز شریف اور وزیراعلیٰ پنجاب مریم نواز شریف نے مری کا اچانک دورہ کر کے مال روڈ پر موجود سیاحوں اور مقامی شہریوں کو حیران کر دیا۔ اس غیر رسمی دورے کے دوران جہاں سیاسی سرگرمی نظر آئی، وہیں انتظامی امور کا بھی کڑا جائزہ لیا گیا۔
مال روڈ پر پہنچنے پر میاں محمد نواز شریف اپنی گاڑی سے اتر کر عام شہریوں کے درمیان پہنچ گئے۔
انہوں نے وہاں موجود افراد سے مصافحہ کیا، ان کی خیریت دریافت کی اور درپیش مسائل کے بارے میں دریافت کیا۔
شہریوں نے اپنے لیڈر کو اچانک اپنے درمیان پا کر بھرپور نعرے بازی کی، جس کا جواب نواز شریف اور مریم نواز نے ہاتھ ہلا کر دیا۔
دورے کے موقع پر انتظامیہ ہائی الرٹ رہی۔پولیس اور ضلعی انتظامیہ کی بھاری نفری مال روڈ اور ملحقہ راستوں پر تعینات تھی تاکہ عوام کے رش میں سیکیورٹی کو یقینی بنایا جا سکے۔
وزیراعلیٰ مریم نواز نے صفائی ستھرائی، ٹریفک کی روانی اور سیاحوں کو ملنے والی سہولیات کا تفصیلی معائنہ کیا۔ انہوں نے متعلقہ حکام کو ہدایت کی کہ مری کو عالمی معیار کا سیاحتی مرکز بنانے میں کوئی کسر اٹھا نہ رکھی جائے۔
اس موقع پر مریم نواز شریف کا کہنا تھا”مری پاکستان کا ماتھا ہے، یہاں آنے والے ہر سیاح کو تحفظ اور بہترین سہولیات فراہم کرنا ہماری اولین ترجیح ہے۔ ہم عوامی رابطے کے اس سلسلے کو مزید مضبوط بنائیں گے۔”
عوامی حلقوں نے اس دورے کو حکومت کی جانب سے مری کی رونقیں بحال کرنے اور عوامی مسائل سے آگاہی حاصل کرنے کی ایک مثبت کڑی قرار دیا ہے۔