لاہور:لاہور میں ایک بار پھر طالبہ چھت سے گر کر جان کی بازی ہار گئی ۔ فاطمہ جناح میڈیکل کالج لاہور کی 22 سالہ طالبہ فریحہ نے ہاسٹل کی چھت سے چھلانگ لگا کر زندگی کا چراغ گل کر دیا۔
پولیس کے مطابق فریحہ گزشتہ چھ ماہ سے شدید ڈپریشن کا شکار تھی۔ فائنل ایئر کے امتحانات جاری تھے، ایک پیپر دے چکی تھی اور دوسرے کی تیاری میں مصروف تھی کہ یہ دل دہلا دینے والا سانحہ پیش آ گیا۔ صبح 7 بج کر 55 منٹ پر ایمرجنسی کال موصول ہوئی—طالبہ کو تشویشناک حالت میں ہسپتال منتقل کیا گیا، مگر دماغ میں شدید چوٹ جان لیوا ثابت ہوئی۔
فریحہ کا تعلق کشمیر سے تھا۔ والد کی ریٹائرمنٹ کے بعد خاندان کی واپسی نے اس کے ذہنی دباؤ کو مزید گہرا کر دیا۔ پولیس واقعے کی مختلف پہلوؤں سے تفتیش کر رہی ہے، مگر سوال وہی ہے: کیا ہمارے تعلیمی نظام میں طلبہ کے ذہنی زخم نظر انداز ہوتے رہیں گے؟ افسوسناک طور پر یہ پہلا واقعہ نہیں۔ حال ہی میں لاہور یونیورسٹی میں فارمیسی ڈیپارٹمنٹ کی 21 سالہ طالبہ نے بھی تیسری منزل سے چھلانگ لگا کر خودکشی کی کوشش کی تھی۔
