انڈین ائیرفورس کا طیارہ “چھپڑ“ میں جا گرا، دونوں پائلٹ محفوظ رہے

نئی دہلی :انڈین ایئر فورس کا ایک چھوٹا طیارہ اتر پردیش کے مضافاتی علاقے میں ایک تالاب میں گر گیا تاہم اس میں سوار افراد محفوظ رہے۔
انڈین ٹریبیون کے مطابق حکام کا کہنا ہے واقعہ بدھ کو پراگریج کے علاقے میں پیش آیا، جہاز میں دو پائلٹ سوار تھے۔
رپورٹ میں جہاز کی ساخت کے حوالے سے بتایا گیا ہے کہ یہ ایک مائیکرولائٹ طیارہ تھا جو بہت چھوٹا ہوتا ہے اور صرف تربیتی مقاصد یا سروے وغیرہ کے لیے استعمال کیا جاتا ہے اور حادثے کے وقت وہ معمول کی پرواز پر تھا۔حادثے کے وقت طیارہ پھپھاماؤ کے علاقے کی جانب جا رہا تھا تو اس کے انجن میں کوئی تکنیکی خرابی پیدا ہو گئی۔
ان کے مطابق اس کے تھوڑی دیر بعد جہاز پولیس کے زیرانتظام علاقے جارج ٹاؤن میں کے پی کالج کے قریب ایک تالاب یا “چھپڑ“ میں گر گیا۔
واقعے کے ساتھ ہی مقامی پولیس کے اہلکار اور مقامی لوگ موقع پر پہنچے اور ان کی کوششوں سے دونوں پائلٹوں کو محفوظ طور پر جہاز سے باہر نکال لیا گیا۔