لاہور:بسنت کی تیاریاں مکمل ، لاہور کو تین خصوصی زونز میں تقسیم کردیا گیا، پولیس کا خصوصی سیکیورٹی پلان پیش۔۔پتنگ اورڈورکے ریٹس مقررنہیں ہوں گے،انتظامیہ کی پتنگ فروشوں کے خلاف کارروائیاں صرف سائز اور میٹریل کے استعمال تک محدود رہیں گی۔
لاہور میں بسنت کی تیاری زوروں سے جاری ہے، ضلعی انتظامیہ نےپتنگ اورڈورکےریٹس مقررنہ کرنےکا فیصلہ کرلیا۔پتنگ فروشوں کیخلاف کارروائیاں صرف سائز اور میٹریل کے استعمال سے متعلق ہوں گی،پتنگ اور ڈور فروش اپنی مرضی کے ریٹس پر فروخت کر سکیں گے۔پتنگوں کی قیمت ایک سوپچاس سے دو سوستر روپے تک ہو گی ۔ڈورکا پنا دوہزار دوسو سے دوہزار پانچ سو روپے تک فروخت ہو گا۔مینوفیکچررز کا کہنا ہےکہ ڈیمانڈ کے مطابق پتنگوں اور ڈورکے ریٹس میں مزید اضافہ بھی ممکن ہے۔ضلعی انتظامیہ افسران کے مطابق آئندہ سال بسنت پر قیمتوں کے تعین پرورکنگ کریں گے۔رجسٹرڈ دکانداروں کو بچا ہوا اسٹاک ڈکلیئر کرنا لازم ہو گا۔
دوسری طرفلاہور میں بسنت منانے کے ممکنہ انعقاد کے تناظر میں پولیس نے جامع سیکیورٹی پلان تیار کر کے لاہور ہائی کورٹ میں جمع کرا دیا ہے، جس میں شہریوں کی جان و مال کے تحفظ، غیر قانونی پتنگ بازی کی روک تھام اور امن و امان برقرار رکھنے کے لیے سخت اقدامات تجویز کیے گئے ہیں۔
پولیس رپورٹ کے مطابق بسنت 2026 کے لیے گزشتہ 10 سال کے ڈیٹا کی بنیاد پر ممکنہ خطرات کی نشاندہی کی گئی ہے اور لاہور شہر کو لال، پیلے اور ہرے زونز میں تقسیم کیا گیا ہے تاکہ حساس علاقوں میں اضافی سیکیورٹی یقینی بنائی جا سکے۔
رپورٹ میں واضح کیا گیا ہے کہ پنجاب کائٹ فلائنگ ایکٹ پر مکمل عملدرآمد کرایا جائے گا اور صرف کاٹن ڈور اور رجسٹرڈ پتنگوں کی اجازت ہو گی، جبکہ شیشہ، کیمیکل اور میٹل ڈور کے استعمال کے خلاف زیرو ٹالرنس پالیسی اپنائی جائے گی۔ ہر پتنگ اور ڈور کی کیو آر کوڈ رجسٹریشن لازمی قرار دی گئی ہے تاکہ غیر قانونی سرگرمیوں کی فوری نشاندہی ہو سکے۔
پولیس کے مطابق ڈرونز، سوشل میڈیا مانیٹرنگ اور جدید کنٹرول رومز کے ذریعے پتنگ بازی پر لمحہ بہ لمحہ نظر رکھی جائے گی۔ چھتوں پر شراب نوشی، ہوائی فائرنگ اور دیگر غیر قانونی سرگرمیوں کے خلاف سخت کارروائی عمل میں لائی جائے گی۔
رپورٹ میں بتایا گیا ہے کہ موٹر سائیکل سواروں کے لیے ہیلمٹ اور سیفٹی وائرز کا استعمال لازمی ہو گا، جبکہ ریڈ زون میں اینٹینا کے بغیر داخلے پر پابندی عائد کی جائے گی۔ بسنت کے دنوں میں شہریوں کی سہولت کے لیے 5 ہزار رکشے مفت فراہم کیے جائیں گے، جبکہ ریسکیو، ہیلتھ اور ٹریفک پولیس کو ہائی الرٹ رکھا جائے گا۔
بسنت کی تیاریاں مکمل، لاہور 3 زونز میں تقسیم، سیکیورٹی پلان جمع، پتنگ فروشوں کو منہ مانگے ریٹ مقرر کرنے کی آزادی
