فیصل آباد:: وزیر اعلیٰ پنجاب مریم نواز کے ویژن کے تحت اجتماعی شادیوں کا سلسلہ بھرپور انداز میں جاری ہے۔ پنجاب دھی رانی پروگرام کے تحت ایک پروقار اجتماعی شادیوں کی تقریب مقامی مارکی، شیخوپورہ روڈ، فیصل آباد میں منعقد ہوئی۔
تقریب کے مہمانِ خصوصی صوبائی وزیر سوشل ویلفیئر سہیل شوکت بٹ تھے۔ اس موقع پر کمشنر فیصل آباد راجہ جہانگیر انور، اراکین اسمبلی آزاد علی تبسم، جعفر ہوچہ، فقیر حسین ڈوگر سمیت دیگر معزز شخصیات نے بھی شرکت کی۔
تقریب میں پنجاب دھی رانی پروگرام کے تحت 111 مستحق جوڑوں کی اجتماعی شادیاں کروائی گئیں۔ ان شادیوں میں مسیحی برادری سے تعلق رکھنے والی 8 بیٹیوں کی شادیاں بھی شامل تھیں جبکہ جیل میں قید قیدیوں کی بیٹیوں کو بھی اس فلاحی پروگرام کا حصہ بنایا گیا۔
تمام شادی شدہ جوڑوں کو وزیر اعلیٰ پنجاب مریم نواز کی جانب سے اے ٹی ایم کارڈ کے ذریعے 2 لاکھ روپے سلامی بھی دی گئی تاکہ وہ اپنی نئی زندگی کا آغاز بہتر انداز میں کر سکیں۔
صوبائی وزیر سہیل شوکت بٹ نے تقریب سے خطاب کرتے ہوئے کہا کہ فروری کے آخر تک پنجاب بھر میں 5 ہزار بچیوں کی شادی کا ٹارگٹ مکمل کر لیا جائے گا۔ انہوں نے کہا کہ پنجاب دھی رانی پروگرام مستحق بچیوں کی باعزت رخصتی اور سماجی تحفظ کی عملی مثال ہے۔
انہوں نے مزید کہا کہ بیٹیوں کی خود مختاری اور فلاح و بہبود حکومت کی اولین ترجیح ہے۔ اس پروگرام کا مقصد وسائل کی کمی کے شکار والدین کا بوجھ بانٹنا اور مستحق خاندانوں کو عزت کے ساتھ سہارا دینا ہے۔
صوبائی وزیر نے کہا کہ پنجاب حکومت تمام اضلاع میں بیٹیوں کے سماجی تحفظ کے لیے عملی اقدامات کر رہی ہے۔ سابقہ حکومتوں نے صرف دعوے کیے جبکہ مریم نواز نے عملی خدمت کی مثال قائم کی ہے۔
انہوں نے واضح کیا کہ اجتماعی شادیوں کے تمام اخراجات پنجاب حکومت خود برداشت کر رہی ہے۔ وزیر اعلیٰ مریم نواز نے بیٹیوں کے سر پر شفقت کا ہاتھ رکھا ہے اور یہ پروگرام صرف شادی تک محدود نہیں بلکہ بیٹیوں کی عزتِ نفس کی بحالی کا عملی اقدام ہے۔
آخر میں صوبائی وزیر نے اس عزم کا اظہار کیا کہ پنجاب حکومت مستحق خاندانوں کی کفالت کا یہ سلسلہ مستقبل میں بھی جاری رکھے گی۔
پنجاب دھی رانی پروگرام: مسیحی اور قیدی خاندانوں سمیت 111 بیٹیوں کی شادیاں، اے ٹی ایم کارڈ کے ذریعے دولاکھ کا تحفہ
