لاہور:وزیراعلیٰ پنجاب مریم نواز شریف کے ماحول دوست اور مؤثر حکومتی اقدامات کے باعث لاہور کے فضائی معیار میں گزشتہ سال کے مقابلے میں نئے سال کے آغاز پر نمایاں بہتری ریکارڈ کی گئی ہے۔
2025 کے بعد 2026 میں بھی شہر کے ایئر کوالٹی انڈیکس میں مسلسل بہتری کا رجحان برقرار ہے، جس کی تصدیق ایک تجزیاتی موازنہ رپورٹ سے ہوئی ہے۔
رپورٹ کے مطابق اگرچہ اس عرصے کے دوران بارشیں نہ ہونے کے برابر رہیں اور موسم خشک رہا، اس کے باوجود حکومتی اقدامات کی بدولت فضائی معیار میں واضح بہتری دیکھی گئی۔
اکتوبر 2025 سے 10 جنوری 2026 تک لاہور کے مجموعی ایئر کوالٹی انڈیکس میں 58 پوائنٹس کی بہتری ریکارڈ کی گئی، جبکہ مجموعی طور پر فضائی معیار میں 20 فیصد بہتری سامنے آئی ہے۔
تجزیاتی رپورٹ کے مطابق سال 2025-26 کے 102 دنوں میں سے 60 دنوں میں فضائی معیار بہتر رہا، جو ماحولیاتی رجحان میں مثبت تبدیلی کا واضح ثبوت ہے۔
اکتوبر 2025 میں لاہور کا اوسط ایئر کوالٹی انڈیکس 205 رہا جو اکتوبر 2024 کے 213 کے مقابلے میں 8 پوائنٹس بہتر تھا، اس دوران 16 دن بہتر ایئر کوالٹی کے رہے۔
نومبر 2025 میں فضائی معیار میں غیر معمولی بہتری ریکارڈ کی گئی، جب اوسط ایئر کوالٹی انڈیکس 261 رہا جبکہ نومبر 2024 میں یہ 453 تھا۔
یوں 192 پوائنٹس کی نمایاں کمی دیکھی گئی اور 23 دن بہتر ایئر کوالٹی کے ریکارڈ ہوئے۔
دسمبر 2025 میں اوسط ایئر کوالٹی انڈیکس 247 رہا جو گزشتہ سال کے 235 کے مقابلے میں 13 پوائنٹس زیادہ تھا۔
تاہم اس کے باوجود شدید سموگ کے دوران 14 دن بہتر فضائی معیار کے رہے۔
نئے سال کے پہلے مہینے جنوری 2026 کے ابتدائی 10 دنوں میں اوسط اے کیو آئی 192 رہا، جو گزشتہ سال اسی مدت میں 220 تھا، اس طرح 28 پوائنٹس کی بہتری ریکارڈ کی گئی اور 7 دن بہتر ایئر کوالٹی کے رہے۔
رپورٹ کے مطابق اکتوبر سے دسمبر 2025 کے دوران مجموعی طور پرایئر کوالٹی انڈیکس میں 68 پوائنٹس اور 22 فیصد تک بہتری آئی، جبکہ جنوری میں گزشتہ برس کے مقابلے میں 9 میں سے 7 دنوں میں 33 پوائنٹس تک بہتری دیکھی گئی۔
رپورٹ میں بتایا گیا ہے کہ بارشوں میں کمی کے باوجود فضائی معیار کی بہتری حکومتی پالیسیوں اور سخت انتظامی اقدامات کا نتیجہ ہے۔
ان اقدامات میں دھواں چھوڑنے والی گاڑیوں، غیر معیاری ایندھن کے استعمال اور صنعتی اخراج کے خلاف بلاامتیاز کارروائیاں شامل ہیں۔
ڈیٹا بیسڈ پالیسی سازی، فیلڈ مانیٹرنگ، جرمانوں کے مؤثر نظام، اسموگ اسکواڈز کی تعیناتی اور جدید آلات کے ذریعے آلودگی کے ہاٹ اسپاٹس پر بروقت ایکشن یقینی بنایا گیا۔
تجزیاتی رپورٹ کے مطابق ماحولیاتی قوانین پر سخت عملدرآمد، ادارہ جاتی ہم آہنگی، بروقت فیصلوں، ٹریفک کنٹرول اور انڈسٹری ریگولیشن کے باعث 2025 کے اسموگ سیزن میں خطرناک کیٹیگری کے دنوں میں نمایاں کمی آئی ہے۔
اس موقع پر سینیئر وزیر مریم اورنگزیب نے کہا کہ وزیراعلیٰ مریم نواز شریف کی اولین ترجیح شہریوں کی صحت کا تحفظ ہے۔
ان کا کہنا تھا کہ صاف ہوا کی فراہمی کے لیے اصلاحات کے ساتھ جدید مانیٹرنگ سسٹم متعارف کرایا گیا ہے، جس کے مثبت نتائج سامنے آنا شروع ہو گئے ہیں۔