برازیل:ورلڈ بنک کی ماحولیاتی تبدیلی گروپ کی گلوبل ڈائریکٹر ویلیری ہیکی نے وزیر اعلی پنجاب مریم نواز شریف کو "کلائمیٹ چینج وارئیر” اور "کلائمیٹ لیڈر” قرار دے دیا۔
برازیل میں کاپ کانفرنس کےدوران وزیراعلی پنجاب مریم نوازشریف سے ورلڈ بنک کی ماحولیاتی تبدیلی گروپ کی گلوبل ڈائریکٹر ویلیری ہیکی کی ملاقات ہوئی۔
ویلیری ہیکی نے وزیراعلی پنجاب سے دوران ملاقات گفتگومیں کہا ہے کہ "مریم نواز شریف جنوبی ایشیا سے ‘کلائمیٹ چینج وارئیر’ بن کر ابھری ہیں،”۔
عالمی بینک نے پنجاب حکومت کو عالمی ماحولیاتی مارکیٹ میں شمولیت کی دعوت دے دی جبکہ تعاون کی بھی یقین دہانی کرائی ہے جبکہ ویلیری ہیکی نے وزیراعلی کو ورلڈ بنک کی جانب سے ماحولیاتی شعبے میں بھرپور معاونت کی پیشکش کی۔
ویلیری ہیکی نے کہا کہ ستھرا پنجاب، اے کیوآئی، ٹرانسپورٹ، جنگلات، جنگلی حیات کے منصوبوں میں تعاون کے لئے تیار ہیں، ماحولیاتی بہتری کے منصوبے پنجاب کی عالمی سطح پر شناخت اور عزم کی علامت بن کر سامنے آئے ہیں۔
انہوں نے کہا کہ ایک خاتون وزیراعلی کے طورپر آپ ماحولیاتی شعبے میں عزم وہمت اور تخلیق کی مثال بنی ہیں جس پر خوشی ہے۔
وزیراعلی مریم نوازشریف سے ویلیری ہیکی نے ماحولیاتی بہتری سے متعلق امور پر تبادلہ خیال کیا اور پنجاب میں وزیراعلی مریم نوازشریف کے ماحول دوست اقدامات اور جذبے کو سراہا۔
وزیراعلی مریم نوازشریف کی تقریر کے نکات کو سراہتے ہوئے ویلیری ہیکی نے وزیراعلی مریم نوازشریف کو اُن کی تقریر کے تین اقتباس بھی سنائے۔ان کاکہنا تھا کہ آپ کا یہ جملہ مجھے بہت پسند آیاکہ ’’کاپ30 کو محض اظہارِ خیال کی مجلس کے بجائے پختہ عزم وارادے کے عہد کے طورپر یاد رکھا جانا چاہیے‘‘، ویلیری ہیکی کا کہنا تھا کہ آپ نے درست کہا کہ ’’گلوبل سائوتھ احتجاج نہیں، بامقصد آوازبن کر سامنے آیا ہے‘‘ جبکہ آپ کی اس بات سے پوری طرح متفق ہوں کہ ’’ماحول کی بہتری خیرات نہیں، انصاف ہے ‘‘۔
انہوں نے قراردیا کہ پنجاب میں ماحولیاتی بہتری کے لئے آپ کے منصوبے متاثر کن ہیں جبکہ پنجاب حکومت کا کسی کا انتظار کئے بغیر ماحول کی بہتری کے ایجنڈے پر کام شروع کرنا لائق تحسین ہے۔
وزیراعلی پنجاب مریم نوازشریف نے ویلیری ہیکی کے جذبات اور تحسین پر ان کا شکریہ ادا کیا اور کہا کہ پنجاب کو خطے ہی نہیں، پوری دنیا میں ماحولیاتی بہتری کی ایک قابل تقلید مثال بنانا چاہتی ہوں۔
اس موقع پروزیراعلی مریم نوازشریف کی پنجاب کے دورے کی دعوت ویلیری ہیکی نے قبول کرلی۔
سینئر صوبائی وزیر مریم اورنگزیب اور صوبائی وزرا راناسکندر اور ذیشان رفیق ,چیف سیکرٹری زاہد اختر زمان ، چیئر مین پی اینڈ ڈی نعیم رؤف ڈی جی ای پی اے عمران حامدبھی ملاقات میں موجود تھے۔