قلعہ عبداللہ : ایف سی بلوچستان (نارتھ)، اے این ایف اور سول اداروں نے بلوچستان کے ضلع قلعہ عبداللہ میں مشترکہ انسدادِ منشیات آپریشن کیا، جس کے دوران 600 ایکڑ پر غیر قانونی طور پر کاشت کی گئی بھنگ کی فصل تلف کر دی گئی۔
اس آپریشن کو ایف سی (نارتھ) اور ڈپٹی کمشنر قلعہ عبداللہ کی نگرانی میں مکمل کیا گیا۔ ڈپٹی کمشنر نے کہا کہ غیر قانونی فصل کی دوبارہ کاشت روکنے کے لیے سخت نگرانی جاری رہے گی۔بلوچستان میں مزید 650 ایکڑ رقبہ پر بھنگ کی غیر قانونی کاشت کے خلاف کارروائیاں تیزی سے جاری ہیں۔
عوامی حلقوں نے ایف سی بلوچستان (نارتھ) اور سول اداروں کی مؤثر کارروائی کو سراہا۔ مقامی لوگوں نے کہا کہ منشیات کے خاتمے کے لیے انسدادِ منشیات آپریشنز کا تسلسل برقرار رکھنا ضروری ہے۔منشیات کے خلاف اس مہم کو جاری رکھنے کا عزم صوبے کو منشیات سے پاک کرنے کی جانب ایک اہم قدم ہے۔