لاہور(سیاسی رپورٹر)وزیر اطلاعات و ثقافت پنجاب عظمٰی بخاری نے کہا ہے کہ وزیراعلیٰ پنجاب مریم نواز اپنی کارکردگی عوام کے سامنے سوشل میڈیا کے ذریعے رکھ رہی ہیں۔انہوں نے کہا کہ جو لوگ اپنی کوئی کارکردگی نہیں دکھا سکتے، وہی دوسروں کی محنت پر تنقید کرتے ہیں۔
عظمٰی بخاری نے کہا کہ پنجاب میں سرکاری اسکولوں کی بحالی، سڑکوں کی تعمیر، ہسپتالوں کا قیام، ماحولیات کی بہتری، ستھرا پنجاب پروگرام، اور جدید ٹرانسپورٹ سہولیات عوام کے لیے عملی طور پر فراہم کی جا رہی ہیں۔انہوں نے کہا کہ پنجاب کے عوام کو سوشل سروسز سمیت ہر شعبے میں بہتری کے ثمرات مل رہے ہیں۔وزیر اطلاعات نے مزید کہا کہ چیلنج ہے اگر کسی کے پاس کوئی کارکردگی ہے تو سامنے لا کر دکھائے۔ان کا کہنا تھا کہ کوئی کام کیے ہوں تو دکھتے ہیں، اور بہت سوں کو دُکھتے ہیں۔انہوں نے کہا کہ وزیراعلیٰ مریم نواز کے کام اور وژن پر پوری قوم کو فخر ہے۔