ترکیہ کے صوبے موغلا کے گورنر آفس کا کہنا ہےکہ سیاحتی مقام بودروم کے قریب بحیرہ ایجیئن میں ایک ربڑ کی کشتی الٹنے کے باعث کم از کم 14 تارکینِ وطن ہلاک ہو گئے ہیں۔
غیر ملکی خبر رساں ایجنسی کے مطابق گورنر آفس کی جانب سے سوشل میڈیا پلیٹ فارم ایکس پر جاری بیان میں کہا گیا ہے کہ ’14 غیرقانونی تارکینِ وطن کی لاشیں برآمد کی گئی ہیں۔
بیان کے مطابق کوسٹ گارڈ کو جمعے کی صبح ہنگامی اطلاع موصول ہوئی تھی۔
حکام کے مطابق دو افراد کو زندہ بچا لیا گیا ہے، جن میں سے ایک نے بتایا کہ کشتی میں 18 افراد سوار تھے جب اس میں پانی بھرنا شروع ہوا اور صرف 10 منٹ بعد وہ ڈوب گئی۔ ایک بچ جانے والا شخص تیر کر چیلبی جزیرے تک پہنچنے میں کامیاب ہوا۔
گورنر آفس نے مزید بتایا کہ زندہ بچنے والوں میں ایک افغان شہری شامل ہے، تاہم دیگر کے بارے میں کوئی تفصیل نہیں دی گئی۔واقعے کے بعد چار کوسٹ گارڈ کشتیاں، ایک ہیلی کاپٹر اور ماہر غوطہ خوروں کی ٹیم دو لاپتہ افراد کی تلاش میں مصروف ہیں۔
ترکی کے ساحل اور یونان کے قریبی جزائر، خصوصاً ساموس، روڈس اور لیسبوس، کے درمیان مختصر مگر خطرناک سمندری راستہ اکثر تارکینِ وطن کے لیے مہلک ثابت ہوتا ہے۔
بودروم یونانی جزیرے کوس کے قریب واقع ہے۔
بین الاقوامی تنظیم برائے ہجرت (آئی او ایم) کے مسنگ مائیگرنٹس پراجیکٹ کے مطابق اس برس اب تک تقریباً 1400 تارکینِ وطن بحیرہ روم کے راستے یورپ پہنچنے کی کوشش میں ہلاک ہو چکے ہیں۔