کوئٹہ:بلوچ عوام نے بیرونی جارحیت اور دہشتگردوں کے خلاف حالیہ موثر کارروائیوں پر پاک فوج کو زبردست خراجِ تحسین پیش کیا ہے۔ شہریوں کا کہنا ہے کہ پاک فوج کی بروقت اور مؤثر کارروائیوں نے عوام کا اعتماد مزید مضبوط کیا ہے۔
شہریوں نے مطالبہ کیا ہے کہ افغان حکومت فوری طور پر ان افراد اور گروپوں کے خلاف کارروائی کرے جو سرحد پار کر کے پاکستان میں دہشتگردانہ سرگرمیوں میں ملوث ہیں۔ ایک شہری نے کہا، "افغانستان میں موجود خوارج کے تمام ٹھکانے اور اڈے فوری طور پر ختم کیے جائیں” جبکہ دوسرے نے کہا کہ "افغان حکومت کو چاہیے کہ پاکستان میں دراندازی کرنے والے خوارج پر فوری قابو پائے۔”
عوام نے یاد دہانی کرائی کہ پاکستان نے بارہا افغان حکومت سے درخواست کی ہے کہ وہ اپنی سرزمین کو پاکستان کے خلاف استعمال نہ ہونے دے، ایک شہری نے کہا، ” افغان حکومت نے کوئی قدم نہ اٹھایا تو پاکستان نے مجبور ہو کر دہشت گردوں کے خلاف کارروائیاں کیں۔”
شہریوں نے یہ بھی کہا کہ دہشتگرد عناصر خطے میں امن و امان کو کشیدہ کر رہے ہیں اور ان کے ٹھکانوں کو ختم کر دینا امن کے فروغ کے لیے ضروری ہے۔ خوارج کے ٹھکانے جو پاکستان کے خلاف استعمال ہو رہے تھے ختم کر دیے گئے ہیں۔
بلوچ عوام کا کہنا ہے کہ پاکستان نے افغان بھائیوں کی ہر ممکن مدد کی ہے اور افغانستان کو سوچنا چاہیے کہ وہ بھارت کے ہاتھوں کھلونا نہ بنے۔ پاکستانی فوج نے عوام کی آواز پر لبیک کہتے ہوئے دہشت گردوں کو ٹھکانے لگائے۔