بنکاک :تھائی لینڈ کے دارالحکومت بینکاک کی مرکزی سڑک کا ایک حصہ زمین میں دھنس گیا جس کے باعث سڑک ٹریفک کے لیے بند کردی گئی۔
سوشل میڈیا پر وائرل ویڈیوز میں دیکھا جاسکتا ہے کہ کیسے بینکاک کی ایک سڑک دھنسنا شروع ہوتی ہے اور پھر دیکھتے ہی دیکھتے سڑک کا ایک مکمل حصہ زمین میں دھنس گیا۔
ویڈیو میں دیکھا جاسکتا ہے کہ زمین دھنسنے کے دوران سڑک پر موجود بجلی کے پول اکھڑ گئے اور زیر زمین موجود سیوریج اور پانی کے بڑے پائپ بھی ٹوٹ گئے جن سے پانی نکلنے لگا۔
غیر ملکی میڈیا کے مطابق یہ حادثہ بینکاک کے ایک مقامی پولیس اسٹیشن اور واجیرا اسپتال کے باہر پیش آیا جس کے نتیجے میں سڑک پر تقریباً 50 میٹر (160) فٹ چوڑا گھڑا پڑ گیا۔
اس حوالے سے بینکاک کی مقامی انتظامیہ کا بتانا ہے کہ سڑک دھنسنے کی ممکنہ وجہ حالیہ بارش اور پائپ سے پانی کا رساؤ ہے تاہم اس حوالے سے مزید تحقیقات کی جارہی ہیں۔