لاہور:دریائے چناب میں انتہائی اونچے درجے کے سیلاب کا الرٹ جاری کردیا گیا، ریلا ملتان ڈویژن کی حدود میں پہنچ گیا، دریائے راوی میں بھی اونچے درجےکا سیلاب ہے، ہیڈسدھنائی کو بچانے کے لیے مائی صفوراں بند توڑ دیا گیا۔
انتہائی اونچے درجے کے سیلاب کے الرٹ کے بعد دریائے چناب اور ملحقہ ندی نالوں میں پانی کے بہاؤ میں اضافہ ہونے کا امکان ہے۔ ترجمان صوبائی ڈیزاسٹر مینجمنٹ اتھارٹی (پی ڈی ایم اے) کے مطابق دریائے چناب میں مرالہ خانکی اور قادر آباد کے مقام پر سیلاب کا خدشہ ہے۔
آئندہ 48 گھنٹوں میں دریائے راوی اور چناب سے ملحقہ ندی نالوں کے بہاؤ میں غیر معمولی اضافے کا خدشہ ہے، پی ڈی ایم اے پنجاب نے متعلقہ اضلاع کے ڈپٹی کمشنرز کو الرٹ رہنے کی ہدایات کردی ہیں۔
گجرات، سیالکوٹ، وزیر آباد، گجرانوالہ، منڈی بہاالدین، حافظ آباد، سرگودھا، چنیوٹ، جھنگ قصور، اوکاڑہ، پاکپتن، وہاڑی، بہاولنگر، لودھراں، بہاولپور، ملتان اور مظفرگڑھ کے ڈپٹی کمشنرز کو بھی الرٹ جاری کیا گیا ہے۔
دریائےراوی پرسیلابی صورتحال،ٹرینوں کارخ تبدیل کردیاگیا۔مختلف ٹرینوں کوبراستہ لاہور،ساہیوال،کراچی بھجوانےکافیصلہ کیا گیا، پاکستان ایکسپریس،ملت ایکسپریس کوبراستہ لاہور،ساہیوال،کراچی بھجوانےکافیصلہ کیا گیا۔قراقرم ایکسپریس،ہزارہ ایکسپریس کوبراستہ لاہور،ساہیوال، کراچی بھجوانےکافیصلہ کیا ، براستہ فیصل آباد ،کراچی جانے والی ٹرینوں کا رخ تبدیل کیاگیا۔
ڈائریکٹر جنرل (ڈی جی) پی ڈی ایم اے عرفان علی کاٹھیا نے ہدایت کی ہے کہ موسلادھار بارشوں کی صورت میں شہریوں کو پیشگی آگاہ کی جائے، مساجد میں اعلانات اور لوکل سطح پر شہریوں کو محفوظ مقامات پر رہنے کی ہدایات جاری کی جائیں۔محکمہ بلدیات، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو الرٹ کر دیا گیا ہے۔
پنجاب کے شہر کمالیہ میں ہیڈسدھنائی کو بچانے کے لیے دریائے راوی پر مائی صفوراں بند کو بارودی مواد سے توڑ دیا گیا ہے۔
ہیڈ سدھنائی کے مقام پر انتہائی اونچے درجے کا سیلاب ہے ، 12 ہزار کیوسک اضافے کے بعد یہاں پانی کا بہاؤ ایک لاکھ85 ہزار 563 کیوسک ریکارڈ کیا گیا ہے، جس کے باعث مزید کئی دیہات زیر آب اور ہزاروں ایکڑ پر کاشت فصلیں دریا بُرد ہوگئیں، دریائے چناب کا سیلابی ریلا ملتان ڈویژن کی حدود میں پہنچ گیا، درجنوں بستیاں زیرِ آب آچکی ہیں۔
خانیوال کی تحصیل کبیروالا میں سیلابی صورت حال خطرناک حد تک پہنچ گئی، دریائے راوی اور دریائے چناب میں اونچے درجے کے سیلاب کے پیش نظر کئی آبادیاں زیر آب آگئی ہیں، سیلاب کے باعث فصلیں ڈوب گئی ہیں۔
شہادت کندلہ کے مقام پر بند میں شگاف پڑ گیا، لوگوں کو محفوظ مقامات پر منتقل کرنے کا سلسلہ جاری ہے، نیو ہیڈ سدھنائی پر پانی ایک لاکھ 93 ہزار کیوسک تک پہنچ گیا، باٹیاں والا اور شہادت کندلہ میں کئی فٹ تک پانی جمع ہے۔
گاموں والی پل، سیال فقیر، شریف فقیر، گوپال پور، شاہد آباد اور محمود کوٹ مکمل ڈوب گئے جب کہ کھڑی فصلیں تباہ ہوگئیں۔