ایرانی صدر کا پاکستان کا پہلا سرکاری دورہ، لاہور میں پرتپاک استقبا ل

لاہور(ملک ظہیر کی رپورٹ ) ایران کے صدر ڈاکٹر مسعود پزشکیان ایک اعلیٰ سطحی وفد کے ہمراہ اپنے پہلے سرکاری دورے پر پاکستان پہنچے۔ لاہور آمد پر مسلم لیگ ن کے قائد نواز شریف اور وزیراعلیٰ پنجاب مریم نواز نے ان کا پرتپاک استقبال کیا۔ایرانی صدر نے بعدازاں شاعر مشرق علامہ محمد اقبال کے مزار پر حاضری دی اور پھول چڑھائے۔ ان کا یہ دورہ پاکستان اور ایران کے درمیان دوطرفہ تعلقات کے نئے باب کی نوید دے رہا ہے۔صدر مسعود پزشکیان کی صدرِ پاکستان آصف علی زرداری اور اسپیکر قومی اسمبلی سردار ایاز صادق سے اہم ملاقاتیں شیڈول ہیں۔ ان ملاقاتوں میں اقتصادی، تجارتی، سیکیورٹی اور علاقائی تعاون کے امور زیر بحث آئیں گے۔ایران سے روانگی سے قبل ایرانی میڈیا سے گفتگو کرتے ہوئے صدر نے کہا کہ ان کے دورے کا بنیادی مقصد دونوں ممالک کے درمیان اقتصادی و تجارتی روابط کو فروغ دینا ہے۔ انہوں نے امید ظاہر کی کہ سرحدی منڈیوں کے قیام اور باہمی روابط کے ذریعے نئے مواقع پیدا کیے جا سکیں گے۔صدر نے پاک ایران تجارت کا سالانہ حجم 10 ارب ڈالر تک بڑھانے کے عزم کا اظہار کیا اور پاکستان چین اقتصادی راہداری (سی پیک )اور ون بیلٹ ون روڈ منصوبے میں ایران کی بھرپور شمولیت کی خواہش کا اعادہ کیا۔ ان کے بقول، اس منصوبے سے ایران کو یورپ سے جڑنے کا موقع ملے گا۔