اسلام آباد :وزارت خزانہ کے اعداد و شمار کے مطابق جون 2025 سے جون 2026 کے دورا ایک سال میں پاکستان کے مجموعی سرکاری قرضوں میں 6.2 ٹریلین روپے یعنی 6200 ارب روپے کا اضافہ ریکارڈ کیا گیا ہے، جس کے بعد مجموعی قرضوں کا حجم بڑھ کر 90.98 ٹریلین روپے تک پہنچ گیا ہے۔
وزارت خزانہ کی جانب سے جاری تفصیلات کے مطابق جون 2025 کے اختتام تک پاکستان کا مجموعی سرکاری قرضہ 84.8 ٹریلین روپے تھا، جو جون 2026 کے اختتام تک بڑھ کر 90.98 ٹریلین روپے ہو گیا۔
مالی سال 2027 سے 2029 کے لیے وزارت خزانہ کی جانب سے تیار کردہ قرضوں کی پائیداری کے تجزیے کے مطابق جون 2026 کے اختتام تک حکومت اور حکومت کی ضمانت یافتہ مجموعی قرضوں کا حجم 90.98 ٹریلین روپے تک جا پہنچا، جبکہ جون 2025 کے اختتام پر یہ قرضے 84.8 ٹریلین روپے تھے۔
تاہم قرضوں کا مجموعی قومی پیداوار یعنی جی ڈی پی سے تناسب کم ہو کر 72 فیصد پر آ گیا ہے۔
قرضوں کے حجم میں اضافے کے باوجود جی ڈی پی کے مقابلے میں قرضوں کے تناسب میں کمی معاشی اعداد و شمار کا ایک نمایاں پہلو ہے، جو معاشی نمو اور قرضوں کے انتظام کے تناظر میں اہمیت رکھتا ہے۔
وزارت خزانہ کے مطابق مالی سال 2027 سے 2029 کے دوران قرضوں کی پائیداری سے متعلق تجزیے کی روشنی میں قرضوں کے انتظام اور معاشی توازن کو برقرار رکھنا آئندہ مالیاتی پالیسیوں کا اہم حصہ رہے گا۔


