ممبئی / ویب ڈیسک: بالی وڈ اداکارہ اور سابق مس یونیورس سشمیتا سین نے 19 نومبر کو اپنی 51ویں سالگرہ منائی، تاہم اس موقع پر ان کے سابق ساتھی للت مودی کی جانب سے شیئر کی گئی سوشل میڈیا پوسٹ نے صارفین اور شوبز حلقوں کی خاصی توجہ حاصل کرلی۔
تفصیلات کے مطابق للت مودی نے انسٹاگرام پر سشمیتا سین کے ساتھ ایک تصویر پوسٹ کی جس پر "Happy Birthday My Friend” درج تھا۔ تصویر کے کیپشن میں انہوں نے سشمیتا کو اپنی "انتہائی قریبی دوست” قرار دیتے ہوئے سالگرہ کی مبارکباد دی اور نیک خواہشات کا اظہار کرتے ہوئے لکھا کہ وہ یوں ہی مسکراتی رہیں۔
سوشل میڈیا صارفین کی جانب سے اس پوسٹ پر دلچسپ تبصرے کیے جا رہے ہیں اور علیحدگی کے باوجود باہمی احترام اور دوستی پر مبنی اس پیغام کو سراہا جا رہا ہے۔
واضح رہے کہ جولائی 2022 میں للت مودی نے مالدیپ اور سارڈینیا کی تعطیلات کی تصاویر شیئر کرتے ہوئے سشمیتا سین کے ساتھ اپنے تعلقات کا باضابطہ اعلان کیا تھا اور انہیں اپنا "بیٹر ہاف” کہا تھا، جس کے بعد سوشل میڈیا پر ان کی شادی سے متعلق مختلف چہ میگوئیاں بھی شروع ہو گئی تھیں۔ تاہم اس اعلان کے چند ہی ماہ بعد ستمبر 2022 میں دونوں کے درمیان علیحدگی کی خبریں سامنے آئیں۔ بعد ازاں 2026 میں دیے گئے ایک انٹرویو میں للت مودی نے طویل فاصلوں کو اس رشتے کے برقرار نہ رہنے کی بڑی وجوہات میں سے ایک قرار دیا تھا۔

