سڈنی/لاہور: پاکستانی فلم انڈسٹری کی لیجنڈری اداکارہ نغمہ بیگم نے آسٹریلیا سے اپنے ایک خصوصی پیغام میں خوشخبری سناتے ہوئے کہا ہے کہ اللہ تعالیٰ کی خصوصی رحمت اور عوام کی دعاؤں سے ان کی اکلوتی بیٹی کی جان بچا لی گئی ہے اور اب ان کی طبیعت پہلے کے مقابلے میں کافی بہتر ہے۔
واضح رہے کہ چند ماہ قبل اس وقت انتہائی رقت آمیز صورتحال پیدا ہو گئی تھی جب نغمہ بیگم کی صاحبزادی آسٹریلیا کے ایک اسپتال کے انتہائی نگہداشت کے وارڈ (آئی سی یو) میں زندگی اور موت کی کشمکش میں مبتلا تھیں، جبکہ سینئر اداکارہ لاہور میں بے بسی کے عالم میں رو رو کر اپنی بیٹی تک پہنچنے کے لیے مدد کی اپیل کر رہی تھیں۔ اس کڑے وقت میں شوبز انڈسٹری نے مثالی یکجہتی کا مظاہرہ کیا اور معروف ہدایت کار سید نور، اداکارہ مدیحہ شاہ اور دردانہ رحمان سمیت دیگر فنکاروں کی خصوصی کاوشوں اور تعاون سے نغمہ بیگم کو ویزا ملا اور وہ اپنی بیٹی کے پاس آسٹریلیا پہنچنے میں کامیاب ہوئیں۔
آسٹریلیا سے جاری تفصیلات کے مطابق نغمہ بیگم کی بیٹی معدے کے شدید عارضے میں مبتلا ہونے کے باعث انتہائی تشویشناک حالت میں تھیں، تاہم والدہ کو اپنے سرہانے دیکھ کر انہیں نیا حوصلہ ملا۔ نغمہ بیگم خود بھی علالت کا شکار ہیں، اس کے باوجود وہ پورا دن اسپتال میں بیٹی کی تیمارداری کرتی ہیں اور اسپتال انتظامیہ کے ضوابط کے تحت رات کے وقت قریبی کرائے کے فلیٹ میں قیام کرتی ہیں۔
گزشتہ دنوں نغمہ بیگم کو اس وقت ایک نئی آزمائش کا سامنا کرنا پڑا جب ان کے مختصر مدتی ویزے کی میعاد ختم ہونے کے قریب پہنچ گئی۔ اس صورتحال میں انہوں نے قانونی چارہ جوئی کرتے ہوئے عدالت سے رجوع کیا اور مؤقف اپنایا کہ ان کی بیٹی شدید بیمار اور تنہا ہے جسے ماں کے سہارے کی اشد ضرورت ہے۔ آسٹریلوی قانونی نظام کے تحت ان کی انسانی ہمدردی کی بنیاد پر دائر درخواست پر فیصلہ آنے تک انہیں آسٹریلیا میں قیام کی باضابطہ اجازت دے دی گئی ہے، جبکہ امید ظاہر کی جا رہی ہے کہ جلد ان کے ویزے میں مزید توسیع بھی ہو جائے گی۔
نغمہ بیگم نے آسٹریلیا میں مقیم پاکستانی کمیونٹی کے جذبے کو سراہتے ہوئے کہا کہ کئی ہم وطنوں نے اسپتال آ کر ان کی دلجوئی کی، ہر ممکن تعاون کا یقین دلایا اور حتیٰ کہ رات کے قیام کے لیے اپنے گھروں کے دروازے بھی کھول دیے، جس پر وہ ان سب کی تہہ دل سے شکر گزار ہیں۔
اداکارہ نے اپنی صاحبزادی کی تازہ تصویر شیئر کرتے ہوئے مداحوں کو آگاہ کیا کہ اگرچہ ان کی حالت خطرے سے باہر اور پہلے سے بہتر ہے، تاہم منہ کے ذریعے خوراک نہ لے سکنے کے باعث انہیں ابھی اسپتال سے فارغ نہیں کیا گیا اور علاج کا سلسلہ جاری ہے۔ آخر میں نغمہ بیگم نے ایک بار پھر پوری قوم سے اپنی بیٹی کی مکمل صحت یابی کے لیے خصوصی دعاؤں کی اپیل کی ہے۔
اللہ کی غائبانہ مدد سے میری بیٹی کی جان بچ گئی”؛ سینئر اداکارہ نغمہ بیگم کا آسٹریلیا سے جذباتی پیغام،

