اسلام آباد: نیشنل سائبر کرائم انویسٹی گیشن ایجنسی (NCCIA) اسلام آباد نے آن لائن مالیاتی فراڈ میں ملوث ایک منظم نیٹ ورک کے خلاف بڑی کامیابی حاصل کرتے ہوئے جعلی ٹریول ایجنسی کے ذریعے شہریوں کو لوٹنے والے 4 ملزمان کو گرفتار کر لیا ہے۔ گرفتار ملزمان کے خلاف سائبر کرائم ایکٹ (PECA 2016) اور تعزیراتِ پاکستان (PPC) کی متعلقہ دفعات کے تحت 2 مقدمات (FIRs) درج کر لیے گئے ہیں۔
این سی سی آئی اے کے حکام کے مطابق ملزمان نے شہریوں کو آن لائن جھانسہ دینے کے لیے جدید ذرائع ابلاغ اور سوشل میڈیا کا سہارا لے رکھا تھا۔
تحقیقاتی ایجنسی کی جانب سے جاری کردہ تفصیلات کے مطابق ملزمان کا طریقۂ واردات انتہائی شاطرانہ تھا،ملزمان مختلف واٹس ایپ گروپس اور سوشل میڈیا پلیٹ فارمز پر جعلی ٹریول ایجنسی کے نام سے سستے ویزوں اور ہوائی جہاز کی ٹکٹوں کے دلکش اشتہارات چلاتے تھے۔
ویزا اور ایئر ٹکٹ فراہم کرنے کا جھانسہ دے کر ملزمان سادہ لوح شہریوں اور بیرونِ ملک جانے کے خواہش مندوں سے بھاری رقوم اپنے اکاؤنٹس میں منتقل کرواتے تھے۔
رقم وصول کرنے کے بعد ملزمان شہریوں کو جعلی ویزے اور بوگس ایئر ٹکٹس جاری کر دیتے تھے، جس کا انکشاف ایئرپورٹ پہنچنے یا تصدیق کے دوران ہوتا تھا۔
این سی سی آئی اے حکام کا کہنا ہے کہ گرفتار ملزمان سے قبضے میں لیے گئے موبائل فونز، کمپیوٹرز اور بینک اکاؤنٹس کا ڈیٹا حاصل کر لیا گیا ہے جس سے مزید سنسنی خیز انکشافات متوقع ہیں۔
حکام نے مزید بتایا کہ اس نیٹ ورک کے دیگر سہولت کاروں کی گرفتاری کے لیے چھاپے مارے جا رہے ہیں اور مقدمات کی تفتیش کو تیزی سے آگے بڑھایا جا رہا ہے۔ NCCIA نے شہریوں سے اپیل کی ہے کہ وہ آن لائن ٹریول ایجنسیوں سے معاملات طے کرنے سے قبل متعلقہ اداروں اور بالخصوص سول ایوی ایشن یا وزارتِ خارجہ سے ویزوں اور لائسنس کی تصدیق لازمی کریں۔
NCCIA اسلام آباد کا بڑا کریک ڈاؤن، جعلی ٹریول ایجنسی کے ذریعے واٹس ایپ گروپس میں فراڈ کرنے والے 4 ملزمان گرفتار!
