سیالکوٹ (سلیم احمد اعوان شیخو)
نوجوان کو ٹانگ سے معذور کرنے والے انتہائی مطلوب اشتہاری ملزم اسلم عرف کالا کو پولیس نے گرفتار کر لیا۔بتایا گیا ہے کہ تھانہ پھوکلیان کے علاقہ دیاورہ میں سابقہ رنجش کی بناء پر محمد اسلم عرف کالا نے اپنے دیگر ساتھیوں کے ہمراہ محمد صدیق کے گھر پر حملہ کر کے اس کے بیٹے عتیق کی ٹانگ پر فائر مار کر اس کی ٹانگ کو شدید زخمی کر دیا اور ٹانگ اس قدر متاثر ہوئی کہ ڈاکٹروں نے اس ٹانگ کاٹ دی اور عتیق مستقل طور پر معذور ہو کر رہ گیا۔ اس سنگین واقعہ اور محمد اسلم عرف کالا کی مسلسل روپوشی پر متاثرہ خاندان اور اہلِ علاقہ میں شدید تشویش پائی جاتی تھی تو مذکورہ تھانہ کی پولیس نے عرصہ 6 ماہ سے مفرور اشتہاری ملزم محمد اسلم عرف کالا کو مخبری خاص کی اطلاع پر گرفتار کر لیا۔معلوم ہوا ہے کہ ڈسٹرکٹ پولیس آفیسر سیالکوٹ کیپٹن ریٹائرڈ دوست محمد نے ایس ڈی پی او صدر سرکل رانا ندیم طارق کو ملزم کی گرفتاری کا خصوصی ٹاسک سونپتے ہوئے پیش رفت کی مسلسل نگرانی کی۔ ڈی ایس پی کی سربراہی میں ایس ایچ او تھانہ پھوکلیاں سب انسپکٹر محمد امین نے اپنی ٹیم کے ہمراہ مخبر خاص کی مدد سے محمد اسلم عرف کالا کو کامیاب چھاپہ مار کر گرفتار کر لیا۔ ملزم سے مزید تفتیش جاری ہے۔