سرگودھا (راجہ نورالہی عاطف سے)
سرگودھا ڈویژن میں تائیکوانڈو کے کھیل کو عروج پر پہنچانے اور نوجوان نسل کو مثبت سرگرمیوں کی جانب راغب کرنے کے لیے تائیکوانڈو ایسوسی ایشن کے نئے اور باصلاحیت عہدیداران کا باضابطہ اعلان کر دیا گیا ہے۔ کھیلوں کے حلقوں میں اس نئی ٹیم کے انتخاب کو ایک شاندار اور تاریخی قدم قرار دیا جا رہا ہے۔نئی نامزدگیوں کے مطابق:ڈاکٹر عرفان کو صدر سرگودھا ڈویژن خاور مجید کو ڈویژن سیکرٹری ایڈووکیٹ ہائی کورٹ سعدیہ ہماء شیخ (سابق نائب صدر سرگودھا بار) کو وائس چیئرمین سرگودھا ڈویژن امامہ عرفان کو ڈسٹرکٹ سیکرٹری نامزد ڈویژن سیکرٹری خاور مجید تائیکوانڈو کے فروغ کے لیے اپنی گراں قدر خدمات کے حوالے سے ایک منفرد مقام رکھتے ہیں۔ وہ پاکستان پولیس کی نمائندگی کرتے ہوئے قومی سطح کے مقابلوں میں شاندار کارکردگی کا مظاہرہ کر چکے ہیں، اور ان کا یہ تجربہ سرگودھا کے کھلاڑیوں کے لیے مشعلِ راہ ثابت ہوگا۔ اس موقع پر تمام اراکین نے نو منتخب عہدیداران پر بھرپور اعتماد کا اظہار کیا ہے۔ تقریب کے بعد گفتگو کرتے ہوئے نامزد عہدیداران نے عزم ظاہر کیا کہ وہ پاکستان تائیکوانڈو فیڈریشن کے چیئرمین کرنل وسیم احمد جنجوعہ اور پنجاب تائیکوانڈو فیڈریشن کے قائم مقام صدر وسیم شہزاد کی ولولہ انگیز سرپرستی میں سرگودھا ڈویژن میں تائیکوانڈو کو بلندیوں پر لے جائیں گے۔انہوں نے کہا کہ نوجوان کھلاڑیوں کی جدید بنیادوں پر تربیت، انہیں بہترین سہولیات کی فراہمی اور ضلعی، ڈویژنل، صوبائی اور قومی سطح پر آگے بڑھانے کے لیے عملی اقدامات کیے جائیں گے۔ باہمی تعاون اور مؤثر حکمت عملی کے ذریعے سرگودھا کے گلی محلوں سے چھپے ہوئے ٹیلنٹ کو تلاش کر کے قومی دھارے میں شامل کیا جائے گا تاکہ ہمارے کھلاڑی ملکی و بین الاقوامی سطح پر پاکستان کا نام روشن کریں۔