بیجنگ/لہاسا:(ویب ڈیسک)
چین کے خود مختار خطے تبت میں 7.0 شدت کے ایک انتہائی طاقتور زلزلے نے تباہی مچادی ہے۔ ناگچو اورگرد و نواح کے بلند پہاڑی علاقوں میں آنے والے اس زلزلے کے نتیجے میں اب تک کم از کم 16 افراد جاں بحق اور 60 سے زائد افراد زخمی ہو چکے ہیں، جبکہ ہلاکتوں میں اضافے کا خدشہ ظاہر کیا جا رہا ہے۔زلزلے کی شدت اتنی زیادہ تھی کہ اس کے نتیجے میں سیکڑوں رہائشی مکانات، عمارتیں اور مویشیوں کے شیڈز زمین بوس ہو گئے ہیں۔ پہاڑی اور دشوار گزار علاقہ ہونے کے باوجود امدادی ٹیمیں، ریسکیو ورکرز اور سکیورٹی فورسز فوری طور پر متاثرہ علاقوں میں پہنچ گئی ہیں، جہاں ملبے تلے دبے افراد کو نکالنے اور زخمیوں کو طبی امداد فراہم کرنے کے لیے ہنگامی آپریشن جاری ہے۔متاثرہ سخت سرد موسم کے پیش نظر بے گھر ہونے والے خاندانوں کو خیمے، گرم ملبوسات اور خوراک فراہم کی جا رہی ہے۔ زلزلے کے بعد آنے والے متعدد طاقتور آفٹر شاکس (Aftershocks) نے مقامی آبادی میں شدید خوف و ہراس پھیلا دیا ہے اور امدادی کاموں میں بھی شدید مشکلات کا سامنا ہے۔