بہاولپور ضمنی الیکشن: مریم نواز کی کارکردگی پر عوام نے مہر ثبت کر دی، عظمیٰ بخاری

لاہور: صوبائی وزیر اطلاعات عظمیٰ بخاری نے بہاولپور کے ضمنی الیکشن میں مسلم لیگ (ن) کے امیدوار کی شاندار کامیابی پر ردعمل دیتے ہوئے کہا ہے کہ حلقے کے عوام نے ایک بار پھر وزیراعظم شہباز شریف اور وزیراعلیٰ پنجاب مریم نواز کی پالیسیوں پر مکمل اعتماد کا اظہار کیا ہے۔میڈیا سے گفتگو کرتے ہوئے صوبائی وزیر نے کہاکہ مسلم لیگ (ن) کے امیدوار منیر اقبال چنڑ کی بڑے مارجن (39 ہزار سے زائد ووٹوں) سے کامیابی دراصل وزیراعلیٰ مریم نواز کی شاندار کارکردگی اور عوامی دوست پالیسیوں کا عملی اعتراف ہے۔ انہوں نے کہا کہ سال 2024 کے عام انتخابات کے بعد سے اب تک پنجاب میں ہونے والے تمام ضمنی انتخابات میں ن لیگ نے بڑی برتری حاصل کی ہے، جو اس بات کا ثبوت ہے کہ صوبے کے عوام حکومت کی کارکردگی سے پوری طرح مطمئن ہیں۔عظمیٰ بخاری کا کہنا تھا کہ پنجاب کے عوام روایتی نعروں کی بجائے عملی اقدامات کو ووٹ دے رہے ہیں۔ جن میں الیکٹرک بسیں، لیپ ٹاپ سکیم، طلبہ کے لیے سکالرشپس، گرین ٹریکٹر پروگرام، ‘اپنی چھت اپنا گھر’ سکیم، الیکٹرک بائیکس، اور ‘ستھرا پنجاب’ جیسے منصوبے شامل ہیں جو شہروں کی خوبصورتی اور شہریوں کی فلاح و بہبود کا ضامن ہیں۔انہوں نے مزید کہا کہ مریم نواز کا طرزِ حکمرانی اب ملک بھر کے دیگر صوبوں کے لیے ایک مثال بن چکا ہے۔ دوسری جانب تنقید کرنے والوں کوڑے آڑے ہاتھوں لیتے ہوئے عظمیٰ کا کہنا تھا کہ کچھ عناصر آج بھی انتشار، فساد اور دھرنوں کی سیاست کو ہی اپنی سیاست سمجھتے ہیں، لیکن پاکستان کے عوام اب ان بلوائیوں اور جٹہوں کی سیاست سے بیزار ہو چکے ہیں۔