سیکیورٹی فورسز کی بلوچستان میں کارروائیاں، 33 بھارتی حمایت یافتہ دہشت گرد ہلاک

راولپنڈی :سیکیورٹی فورسز نے بلوچستان میں دہشت گردوں کے خلاف کارروائیاں کرتے ہوئے بھارتی حمایت یافتہ 33 دہشت گردوں کو ہلاک کردیا ہے۔
پاک فوج کے شعبہ تعلقات عامہ (آئی ایس پی آر) کے مطابق بلوچستان میں فتنہ الخوارج اور فتنہ الہندوستان کے خلاف کے خلاف سیکیورٹی فورسز کی کارروائیاں جاری ہیں، جہاں 21 ستمبر سے اب تک کی گئیں مختلف کارروائیوں کے دوران بھارتی پراکسی سے تعلق رکھنے والے 33 دہشت گرد مارے گئے۔
آئی ایس پی آر کے مطابق 24 ستمبر کو آپریشن شعبان کے دوران مزید 5 بھارتی حمایت یافتہ خوارج ہلاک کیے گئے، جس کے بعد ہلاک دہشت گردوں کی مجموعی تعداد 22 ہوگئی، آپریشن شعبان میں دہشت گردوں کے ٹھکانوں سے اسلحہ، گولہ بارود اور دھماکا خیز مواد برآمد کیا گیا۔
آئی ایس پی آر نے بتایا کہ علاقے سے دہشت گردوں کے مکمل خاتمے تک کلیئرنس آپریشن جاری رہے گا۔
بلوچستان کے مختلف علاقوں میں کی گئیں کارروائیوں کے حوالے سے آئی ایس پی آر نے مزید بتایا کہ 25 ستمبر کو نوشکی میں انٹیلی جنس بیسڈ آپریشن کے دوران دہشت گردوں کے ٹھکانے پر مؤثر کارروائی کی گئی، سیکیورٹی فورسز کی کارروائی میں دہشت گردوں سے شدید فائرنگ کا تبادلہ ہوا اور اس دوران 11 دہشت گرد مارے گئے۔
ترجمان پاک فوج نے مزید بتایا کہ آپریشن عزم استحکام کے تحت غیرملکی سرپرستی میں ہونے والی دہشت گردی کے خاتمے تک سیکیورٹی فورسز اور قانون نافذ کرنے والے اداروں کی کارروائیاں جاری رہیں گی۔
صدر مملکت کا سیکیورٹی فورسز کو خراجِ تحسین
صدر مملکت آصف علی زرداری نے بلوچستان میں بھارتی سرپرستی میں سرگرم فتنہ الخوارج اور فتنہ ہندوستان کے خلاف کامیاب کارروائیوں پر سیکیورٹی فورسز کو خراجِ تحسین پیش کیا ہے۔
صدر مملکت نے آپریشن شعبان کے دوران بھارتی سرپرستی میں سرگرم مزید خوارج کو ہلاک کرنے پر سیکیورٹی فورسز کی بہادری اور پیشہ ورانہ صلاحیتوں کو سراہا۔