کیلیفورنیا:ٹیکنالوجی کی دنیا کی سب سے بڑی کمپنی ایپل کا سالانہ میگا ایونٹ آج منعقد ہونے جا رہا ہے، جہاں دنیا بھر کی نظریں نئے آئی فون 18 پرو، پرو میکس اور ایپل کے پہلے فولڈ ایبل آئی فون کی رونمائی پر مرکوز ہیں۔ یہ پہلا موقع ہے کہ ایپل کا یہ تاریخی ایونٹ نئے چیف ایگزیکٹو جان ٹرنَس کی سربراہی میں منعقد کیا جا رہا ہے۔
معروف جریدے وائرڈ اور میک رومرز کی رپورٹس کے مطابق، آج کے اس ایونٹ میں سب سے زیادہ توجہ کا مرکز آئی فون 18 پرو اور پرو میکس ہوں گے، جن میں جدید ترین چپ سیٹ، بہتر بیٹری لائف، کیمرا کا متغیر اپرچر سسٹم اور چھوٹے سائز کا ڈائنامک آئی لینڈ دیے جانے کی توقع ہے۔ تاہم، سب سے بڑا سرپرائز ایپل کا پہلا فولڈ ایبل فون ہو سکتا ہے، جسے غالباً ‘آئی فون الٹرا’ کا نام دیا جائے گا۔ کتاب کی طرح کھلنے والے اس فون میں تقریباً 5.5 انچ کی بیرونی اور 7.8 انچ کی بڑی اندرونی اسکرین دیے جانے کا امکان ہے، جس کے ذریعے ایپل اب سام سنگ اور گوگل جیسی حریف کمپنیوں کو فولڈ ایبل مارکیٹ میں سخت ٹکر دینے کے لیے تیار ہے۔
رپورٹس میں یہ بھی بتایا گیا ہے کہ کمپنی روایتی انداز کو تبدیل کرتے ہوئے اس بار ابتدائی طور پر صرف پرو ماڈلز اور فولڈ ایبل فون ہی متعارف کرا رہی ہے، جبکہ عام آئی فون 18 اور آئی فون ایئر کی اگلی جنریشن کو 2027 کے موسمِ بہار تک مؤخر کر دیا گیا ہے۔ نئے آئی فونز کے علاوہ ایونٹ میں ایپل واچ سیریز 12، ایپل واچ الٹرا 4، ایئر پوڈز کی نئی جنریشن اور جدید آپریٹنگ سسٹمز (بشمول آئی او ایس 27) کی تفصیلات بھی پیش کی جائیں گی۔
آئی فون 18 پرو، پہلے فولڈ ایبل آئی فون اور نئی واچز کی رونمائی کب کہاں ہوگی؟
