لندن :انٹرنیشنل کرکٹ کونسل (آئی سی سی) نے ٹیسٹ پلیئرز کی رینکنگ جاری کر دی ہے۔
پاکستانی کرکٹ ٹیم کے کپتان بابر اعظم کی ٹیسٹ کرکٹ میں ناقص کارکردگی کا اثر نئی عالمی ٹیسٹ رینکنگ میں بھی سامنے آگیا، جہاں وہ ٹاپ 10 بلے بازوں کی فہرست سے باہر ہوگئے ہیں۔
تازہ ٹیسٹ بیٹرز رینکنگ کے مطابق بابر اعظم کو 5 درجے تنزلی کا سامنا کرنا پڑا، جس کے بعد وہ 15ویں نمبر پر پہنچ گئے ہیں۔
دوسری جانب قومی ٹیم کے وکٹ کیپر بیٹر محمد رضوان بھی رینکنگ میں نمایاں نیچے چلے گئے۔ محمد رضوان کی 7 درجے تنزلی ہوئی، جس کے بعد وہ ٹیسٹ بیٹرز کی عالمی درجہ بندی میں 33ویں پوزیشن پر آگئے ہیں۔
پاکستان کے ایک اور اہم بیٹر سعود شکیل نے نئی رینکنگ میں نمایاں بہتری حاصل کی ہے۔ سعود شکیل کی درجہ بندی میں 15 درجے بہتری ہوئی ہے، جو پاکستانی بیٹنگ لائن کے لیے مثبت پیش رفت قرار دی جا رہی ہے۔
بولنگ کے شعبے میں پاکستان کے فاسٹ بولر محمد عباس نے لارڈز ٹیسٹ میں شاندار کارکردگی کا صلہ حاصل کرلیا۔ لارڈز ٹیسٹ میں 9 وکٹیں حاصل کرنے والے محمد عباس کی ٹیسٹ بولرز رینکنگ میں 10 درجے بہتری ہوئی ہے۔
محمد عباس نئی رینکنگ میں 15ویں پوزیشن پر پہنچ گئے ہیں، جو ان کی حالیہ شاندار بولنگ کارکردگی کا واضح ثبوت ہے۔
