عمرکوٹ رپورٹ: ڈاکٹر ایم لال واگھانی
عمرکوٹ: ایس ایس پی عمرکوٹ سہائی عزیز تالپور کی خصوصی ہدایات پر ضلع عمرکوٹ پولیس کی جانب سے جرائم پیشہ عناصر، شراب فروشوں، غیر قانونی اسلحہ اور گٹکا/ماوا فروشوں کے خلاف زیرو ٹالرنس پالیسی کے تحت کارروائیاں جاری ہیں۔سامارو پولیس نے مقدمہ نمبر 106/2026 میں مطلوب ملزم راشد علی ولد اوبھایو خاصخیلی کو گرفتار کرلیا۔دوسری جانب ڈھورونارو پولیس نے مقدمہ نمبر 43/2026 کے تحت رضا محمد ولد دلدار علی ملاح کو گرفتار کرکے اس کے قبضے سے بغیر لائسنس 30 بور پسٹل، میگزین اور 4 گولیاں برآمد کرلیں۔سی آئی اے پولیس بودر فارم نے بھی کارروائی کرتے ہوئے گٹکا فروخت کرنے کے الزام میں تین ملزمان ٹمون مل ولد تھانو کولہی، گلو ولد پریمو کولہی اور لال چند ولد جیٹھارام کولہی کو گرفتار کیا۔ پولیس کے مطابق ملزمان کے قبضے سے مجموعی طور پر 699 عدد ممنوعہ گٹکا برآمد کیا گیا۔پولیس نے تمام گرفتار ملزمان کے خلاف متعلقہ دفعات کے تحت مقدمات درج کرکے مزید قانونی کارروائی شروع کردی ہے۔ایس ایس پی عمرکوٹ سہائی عزیز تالپور کا کہنا ہے کہ ضلع بھر میں قانون شکن عناصر کے خلاف بلاامتیاز کارروائیاں جاری رہیں گی اور جرائم پیشہ عناصر کے ساتھ کسی قسم کی رعایت نہیں برتی جائے گی۔