یوٹیوب کا بڑا اعلان: سوشل میڈیا سائٹ پر پیسے کمانے دگنا مشکل، کرئیٹرز پر کڑی شرائط

لاہور/نئی دہلی: دنیا کے سب سے بڑے ویڈیو شیئرنگ پلیٹ فارم یوٹیوب نے نئے کریئیٹرز کے لیے یوٹیوب پارٹنر پروگرام (YPP) کے قوانین میں بڑی تبدیلیوں کا اعلان کرتے ہوئے کمائی کی شرائط کو مزید سخت کر دیا ہے۔ 2018 کے بعد اس پروگرام میں کی جانے والی یہ سب سے بڑی تبدیلی قرار دی جا رہی ہے، جس کا مقصد پلیٹ فارم پر بڑھتے ہوئے مواد اور ناظرین کے رجحان کو منظم کرنا ہے۔
یوٹیوب کی جانب سے جاری کردہ تفصیلات کے مطابق، یکم فروری 2027 سے نئے درخواست گزاروں کے لیے درج ذیل معیارات نافذ ہوں گے:
واچ آورز: طویل ویڈیوز کے لیے اب گزشتہ 365 دنوں میں 8 ہزار اہل واچ آورز (Watch Hours) حاصل کرنا لازمی ہوں گے، جو کہ پہلے کے مقابلے میں دگنے (سابقہ 4 ہزار) ہیں۔
شارٹس ویوز: یوٹیوب شارٹس (Shorts) کے ذریعے مونیٹائزیشن کے لیے گزشتہ 90 دنوں میں 2 کروڑ ویوز کی شرط رکھی گئی ہے، جو کہ پہلے ایک کروڑ تھی۔
سبسکرائبرز: چینل کے لیے کم از کم 1 ہزار سبسکرائبرز کی بنیادی شرط بدستور برقرار رکھی گئی ہے۔
پرانے کریئیٹرز پر اثرات
خوش آئند بات یہ ہے کہ جو کریئیٹرز پہلے سے یوٹیوب پارٹنر پروگرام کا حصہ ہیں، ان پر واچ ٹائم اور شارٹس ویوز کے یہ نئے معیارات لاگو نہیں ہوں گے۔ تاہم، شارٹس سے کمائی کرنے والے تمام (نے اور پرانے) کریئیٹرز کے لیے ایک الگ شرط لازمی قرار دی گئی ہے؛ جس کے تحت یکم فروری سے شارٹس کی اشتحادی آمدنی جاری رکھنے کے لیے ہر 90 دن میں کم از کم ایک کروڑ ویوز کا ہدف برقرار رکھنا ہوگا۔ اگر ویوز اس حد سے کم ہوتے ہیں تو صرف شارٹس کی آمدنی معطل ہوگی جبکہ طویل ویڈیوز کی کمائی بدستور جاری رہے گی۔
پریمیم لائٹ اور آمدنی کی تقسیم
دوسری جانب یوٹیوب نے اپنی ‘پریمیم لائٹ’ سروس کو عالمی سطح پر وسعت دینے کا بھی اعلان کیا ہے۔ اس سروس کے ذریعے صارفین اشتہارات کے بغیر ویڈیوز سے لطف اندوز ہو سکیں گے۔ یوٹیوب کے مطابق، پریمیم سبسکرپشن کی خالص آمدنی کا 30 فیصد اور پریمیم لائٹ کی آمدنی کا 60 فیصد حصہ کریئیٹرز کے لیے مختص کیا جائے گا، جو ناظرین کے دیکھنے کے وقت اور ویوز کی بنیاد پر تقسیم ہوگا۔
ان تمام تبدیلیوں کا بنیادی مقصد نئے آنے والے کریئیٹرز کو مزید معیاری اور محنت طلب مواد تخلیق کرنے کی ترغیب دینا ہے تاکہ پلیٹ فارم کے معیار کو مزید بہتر بنایا جا سکے۔