بلوچستان کی سیاست میں ہلچل؛ سردار عبدالرحمٰن کھیتران کی وزارت سے برطرفی کا فیصلہ، سمری گورنر کو ارسال

کوئٹہ (بیورو رپورٹ: رحمت اللہ بلوچ، بے نقاب نیوز):
بلوچستان کی صوبائی سیاست میں ایک بڑی پیش رفت سامنے آئی ہے۔ ذرائع کے مطابق صوبائی حکومت نے صوبائی وزیر سردار عبدالرحمٰن کھیتران کو ان کے عہدے سے ہٹانے کا حتمی فیصلہ کر لیا ہے۔
تفصیلات کے مطابق صوبائی حکومت کی جانب سے سردار عبدالرحمٰن کھیتران کو کابینہ سے برطرف کرنے کے لیے سمری باقاعدہ طور پر گورنر بلوچستان کو ارسال کر دی گئی ہے۔ اس اقدام کو بلوچستان کے سیاسی حلقوں میں انتہائی اہم اور غیر متوقع قرار دیا جا رہا ہے۔
ذرائع نے مزید بتایا ہے کہ سمری گورنر بلوچستان کے پاس پہنچ چکی ہے۔ جیسے ہی گورنر اس سمری پر اپنے دستخط ثبت کریں گے، سردار عبدالرحمٰن کھیتران کی برطرفی کا باضابطہ نوٹیفکیشن جاری کر دیا جائے گا، جس کے بعد وہ صوبائی وزیر کے عہدے پر برقرار نہیں رہیں گے۔
اس برطرفی کی وجوہات کے بارے میں ابھی تک حکومتی سطح پر کوئی واضح بیان جاری نہیں کیا گیا، تاہم اس فیصلے نے صوبائی کابینہ اور اتحادیوں کے درمیان موجود کشیدگی کو ایک نئی بحث کا موضوع بنا دیا ہے۔ سیاسی تجزیہ کاروں کا کہنا ہے کہ یہ فیصلہ بلوچستان کی موجودہ مخلوط حکومت کے مستقبل اور سیاسی توازن پر گہرے اثرات مرتب کر سکتا ہے۔
آنے والے چند گھنٹے صوبائی سیاست کے لیے انتہائی اہم قرار دیے جا رہے ہیں کہ آیا یہ فیصلہ کسی بڑی سیاسی تبدیلی کا پیش خیمہ ثابت ہوگا یا نہیں۔