سیالکوٹ (سلیم احمد اعوان شیخو)
سیکرٹری سوشل ویلفیئر و بیت المال پنجاب سائرہ عمر نے ڈائریکٹر سوشل ویلفیئر گوجرانوالہ ڈویژن ارشاد وحید کے ہمراہ سیالکوٹ میں صنعت زاد، دارالامان اور ماڈل چلڈرن ہوم سمیت سوشل ویلفیئر کمپلیکس کے مختلف شعبہ جات کا معائنہ کیا۔ڈپٹی ڈائریکٹر سوشل ویلفیئر سیالکوٹ شریف گھمن بھی موجود تھے اور انہوں نے سوشل ویلفیئر کمپلیکس کی کارکردگی، جاری فلاحی منصوبوں اور مستحق افراد کو فراہم کی جانے والی سہولیات کے بارے میں تفصیلی بریفنگ دی گئی۔سیکرٹری سوشل ویلفیئر نے کمپلیکس میں زیرِ تربیت بچیوں کی جانب سے تیار کردہ ہینڈ میڈ دستکاری، آرائشی اشیاء اور دیگر تخلیقی مصنوعات کا بھی جائزہ لیا، ان کی صلاحیتوں کو سراہا اور ہنر مندی کے فروغ کے لئے ایسے تربیتی پروگرام مزید مؤثر بنانے کی ہدایت کی۔ سیکرٹری سوشل ویلفیئر پنجاب سائرہ عمر نے اداروں میں فراہم کی جانے والی سہولیات پر اطمینان کا اظہار کرتے ہوئے کہا کہ معاشرے کے کمزور اور محروم طبقات کی فلاح و بہبود حکومت کی اولین ترجیحات میں شامل ہے۔ دورے کے اختتام پر انہوں نے شجرکاری مہم کے تحت پودا بھی لگایا اور ماحول کے تحفظ کے لیے زیادہ سے زیادہ درخت لگانے کی ضرورت پر زور دیا۔