سانحہ کاہنہ:مائیں غم سے نڈھال،14بچوں کی نماز جنازہ ادا،سپرد خاک کردیا گیا،سرکاری مدعیت میں مقدمہ درج

سانحہ لاہور۔مائیں غم سے نڈھال، بچوں کی نماز جنازہ ادا اور تدفین کردی گئی۔ پولیس نے سرکاری مدعیت میں واقعہ کا مقدمہ درج کرلیا۔
حادثے میں ہلاک ہونے والے سات بچوں کی نماز جنازہ منگل کی رات جبکہ تین کی نماز جنازہ بدھ کی صبح ادا کر دی گئی ہے۔ اس واقعے کا مقدمہ انفورسمنٹ انسپکٹر نشتر زون کاشف اسلم کی مدعیت میں درج کیا گیا ہے جس میں غفلت اور لاپرواہی کو سانحے کی بنیادی وجہ قرار دیا گیا۔
واقعے میں اہم پیش رفت سامنے آئی۔ واقعہ سہ پہر ساڑھے تین بجے پیش آیا، جبکہ ریسکیو کو اس کی اطلاع پونے پانچ بجے دی گئی۔جاں بحق ہونے والے بچوں میں مالک مکان کی بیٹی بھی شامل ہے۔
ایف آئی آر میں کسی شخص کو نقصان، تکلیف یا چوٹ پہنچانے کی دفعات شامل کی گئی ہیں۔
ایف آئی آر کے مطابق عمارت کے خستہ حال کمرے کی چھت کے اوپر مرمت کا کام بھی جاری تھا، اضافی بوجھ کی وجہ سے یہ چھت گر گئی جو بچوں کی ہلاکت اور زخمی ہونے کا سبب بنی۔
ڈی آئی جی فیصل کامران کے مطابق پولیس نے جن تین افراد کو حراست میں لیا ہے ان میں مکان کا مالک، اس کا بھائی اور تعمیراتی کام کرنے والا مستری شامل ہیں۔