اوول آفس میں مذہبی آزادی پر اہم اجلاس کے دوران صدر ٹرمپ کی پھر ‘آنکھ لگ گئی’

    واشنگٹن: وائٹ ہاؤس کے اوول آفس میں مذہبی آزادی کمیشن کے وفد کے ساتھ ایک اہم اجلاس کے دوران امریکی صدر ڈونلڈ ٹرمپ کی ایک ویڈیو سوشل میڈیا پر موضوعِ بحث بنی ہوئی ہے، جس میں وہ بظاہر اونگھتے ہوئے یا آنکھیں بند کیے دکھائی دے رہے ہیں۔


    یہ اجلاس اس وقت منعقد ہوا جب قدامت پسند مسیحی رہنماؤں کے ایک گروپ نے صدر ٹرمپ سے ملاقات کی تاکہ امریکہ میں سیاست اور مذہب کو الگ رکھنے کے تصور (Separation of Church and State) پر نظر ثانی کرنے کا مطالبہ کیا جا سکے۔ اجلاس میں شرکاء کا کہنا تھا کہ سیاست اور مذہب کے درمیان "دیوار” کے بجائے "پل” تعمیر کرنے کی ضرورت ہے۔


    تاہم، اس سنجیدہ موضوع پر بات چیت کے دوران سب کی توجہ اس وقت صدر ٹرمپ کی جانب مبذول ہو گئی جب وہ کرسی پر بیٹھے بظاہر اپنی آنکھیں بند کیے ہوئے دکھائی دیے۔ سوشل میڈیا صارفین کی جانب سے اس واقعے پر شدید تبصرے کیے جا رہے ہیں، جبکہ کچھ لوگ اسے صدر کی تھکاوٹ سے تعبیر کر رہے ہیں۔


    واضح رہے کہ حال ہی میں سکریٹری آف اسٹیٹ مارکو روبیو نے کانگریس میں اس بات کی تردید کی تھی کہ صدر ٹرمپ کسی اجلاس کے دوران سو جاتے ہیں۔ تاہم، سوشل میڈیا پر وائرل ہونے والی اس نئی ویڈیو نے ایک بار پھر ان کی صحت اور اجلاسوں میں چوکنا رہنے کی صلاحیت پر بحث چھیڑ دی ہے۔ وائٹ ہاؤس کی جانب سے تاحال اس معاملے پر کوئی باضابطہ بیان جاری نہیں کیا گیا ہے۔

    Related Posts