پنجابی فلم انڈسٹری اور موسیقی کی دنیا کے معروف اداکار و گلوکار گپی گریوال آج کامیابی کی بلندیاں چھو رہے ہیں، لیکن ان کا یہ سفر آسان نہیں تھا۔ شہرت حاصل کرنے سے پہلے انہوں نے زندگی میں کئی مشکلات کا سامنا کیا اور مختلف چھوٹی ملازمتیں بھی کیں۔ گپی گریوال نے اپنے ابتدائی دنوں میں سیکیورٹی گارڈ کے طور پر کام کیا، جبکہ روزگار کے لیے اخبارات تقسیم کرنے کا کام بھی انجام دیا۔ محدود وسائل اور سخت حالات کے باوجود انہوں نے اپنے خوابوں کا دامن نہیں چھوڑا اور مسلسل محنت جاری رکھی۔

گپی گریوال ان دنوں اپنی آنے والی فلم ’کیری آن جٹا 4‘ کے باعث خبروں میں ہیں۔ شو کے دوران انہوں نے میزبان شیکھر سمن سے کھل کر گفتگو کرتے ہوئے اپنے کیریئر کے ابتدائی دنوں، ناکامیوں اور اپنی اہلیہ کے تعاون کے بارے میں بتایا۔

اسٹار بننے کا سفر ہرگز آسان نہیں تھا

گپی گریوال نے کہا کہ اسٹار بننے کا سفر ہرگز آسان نہیں تھا۔ انہوں نے سب سے پہلے موسیقی کی دنیا میں قدم رکھا اور تین میوزک البمز جاری کیے، لیکن انہیں کوئی خاص کامیابی نہیں ملی۔ مسلسل ناکامیوں کے بعد انہوں نے شادی کی اور اپنی اہلیہ کے ساتھ کینیڈا منتقل ہونے کا فیصلہ کیا، جہاں انہیں زندگی کا نیا آغاز کرنا پڑا۔ انہوں نے بتایا، ’’کینیڈا پہنچنے کے بعد نہ میری کوئی پہچان تھی اور نہ ہی آمدنی کا کوئی ذریعہ۔ میری پہلی ملازمت سیکیورٹی گارڈ کی تھی۔ بعد میں میں ایک وقت میں تین تین نوکریاں کرتا تھا۔‘‘

گپی کے مطابق، ’’میں اور میری اہلیہ صبح سویرے اخبار تقسیم کرتے تھے، پھر وہ اپنے کام پر چلی جاتی تھیں۔ وہ ایک سینڈوچ ریسٹورنٹ میں منیجر تھیں۔ شام کے وقت ہم دونوں نے ایک شاپنگ مال کی صفائی کا ٹھیکہ لیا ہوا تھا۔ اس وقت ہمارے ساتھ کوئی اور نہیں تھا، صرف ہم دونوں مل کر تمام کام کرتے تھے۔‘‘ انہوں نے مزید کہا کہ مشکلات کے ان دنوں میں ان کا رشتہ مزید مضبوط ہوتا گیا۔ دونوں روزانہ کام کرنے کے ساتھ مستقبل کی منصوبہ بندی بھی کرتے تھے کہ آگے کیسے بڑھنا ہے اور اپنے خوابوں کو کیسے پورا کرنا ہے۔

اپنی کمائی کا ایک ایک روپیہ بچایا اور اسی جمع پونجی سے اپنا اگلا میوزک البم تیار کیا

گپی گریوال نے بتایا کہ انہوں نے اپنی کمائی کا ایک ایک روپیہ بچایا اور اسی جمع پونجی سے اپنا اگلا میوزک البم تیار کیا، جس نے انہیں انڈسٹری میں شناخت دلائی اور کامیابی کے دروازے کھول دیے۔ واضح رہے کہ “شیکھر ٹونائٹ” یوٹیوب پر نشر کیا جاتا ہے، جہاں معروف شخصیات اپنی زندگی کے دلچسپ اور کم معروف پہلو ناظرین کے ساتھ شیئر کرتی ہیں۔