لاہور:بجلی کے صارفین پر ایک بار پھر مہنگائی بم پھوڑنے کی تیاری ۔۔۔۔ ملک بھر میں فی یونٹ بجلی 82 پیسے تک مہنگی کرنے کی درخواست نیپرا میں دائر کردی گئی۔
نیشنل الیکٹرک پاور ریگولیٹری اتھارٹی (نیپرا) کے مطابق یہ درخواست مئی کے مہینے کی فیول لاگت ایڈجسٹمنٹ کے تحت موصول ہوئی ہے۔ اتھارٹی نے بتایا کہ یہ تجویز سینٹرل پاور پرچیزنگ ایجنسی (سی پی پی اے) کی جانب سے جمع کروائی گئی ہے جو بجلی کی خریداری اور قیمتوں کے تعین میں کلیدی کردار ادا کرتی ہے۔
نیپرا نے واضح کیا ہے کہ اس معاملے پر باقاعدہ سماعت 30 جون کو ہوگی جس میں اس بات کا جائزہ لیا جائے گا کہ آیا یہ اضافہ صارفین تک منتقل کیا جائے یا نہیں۔
ذرائع کے مطابق اگر یہ درخواست منظور ہو جاتی ہے تو بجلی صارفین پر مجموعی طور پر تقریباً 12 ارب روپے کا اضافی بوجھ پڑ سکتا ہے جس سے گھریلو اور صنعتی صارفین کے ماہانہ اخراجات میں اضافہ متوقع ہے۔
سی پی پی اے کے مطابق مئی کے دوران بجلی پیدا کرنے کی اوسط فیول لاگت 9 روپے 25 پیسے فی یونٹ رہی جس کی بنیاد پر یہ نظرثانی طلب کی گئی ہے۔
