لاہور:(رپورٹ ، ملک ظہیر)
لاہور کے علاقہ یکی گیٹ میں ایک انتہائی افسوسناک اور انسانیت کو جھنجھوڑ دینے والا واقعہ سامنے آیا ہے، جہاں 45 سالہ شہری عاصم کو صرف 4500 روپے کی خاطر بے دردی سے موت کے گھاٹ اتار دیا گیا۔
تھانہ یکی گیٹ میں تعینات انچارج انویسٹی گیشن عائشہ اعظم کے مطابق یہ ایک “اندھا کیس” تھا جسے جدید تفتیش اور ہیومن انٹیلیجنس کی مدد سے حل کیا گیا۔ کارروائی کے دوران دو ملزمان کو گرفتار کیا گیا جنہوں نے دورانِ تفتیش اعتراف کیا کہ انہوں نے معمولی رقم 4500 روپے ہتھیانے کے لیے شہری عاصم کو نشانہ بنایا۔
پولیس کے مطابق ملزمان نے مقتول کے گلے میں رسی کا پھندا ڈال کر اسے بے رحمی سے قتل کیا اور واردات کے بعد موقع سے فرار ہوگئے تھے۔ گرفتاری کے بعد انکشافات نے تفتیشی افسران کو بھی افسردہ کر دیا۔
پولیس کا کہنا ہے کہ گرفتار ملزمان کے خلاف ٹھوس شواہد کی بنیاد پر چالان مرتب کیا جا رہا ہے اور انہیں قانون کے مطابق سخت سے سخت سزا دلوانے کے لیے مقدمہ عدالت میں پیش کیا جائے گا۔
صرف 4500 روپے کے لیے شہری ہلاک، لرزا دینے والا انکشاف، انسپکٹر کی آنکھیں پرنم
