لاہور: وزیر اطلاعات پنجاب عظمیٰ بخاری نے کہا ہے کہ پنجاب حکومت نے ‘ستھرا پنجاب’ ویژن کے تحت عید الاضحیٰ پر صفائی آپریشن کو مثالی اور کامیابی سے مکمل کر لیا ہے۔
ایک پریس کانفرنس سے خطاب کرتے ہوئے صوبائی وزیر اطلاعات عظمیٰ بخاری نے بتایا کہ عید کے تین روز کے دوران ‘ستھرا پنجاب’ کے ورکرز نے صوبہ بھر سے 3 لاکھ 60 ہزار ٹن آلائشیں کامیابی سے ٹھکانے لگائیں۔ انہوں نے تفصیلات بتاتے ہوئے کہا کہ اس بڑے آپریشن میں ایک لاکھ 84 ہزار ورکرز اور 60 ہزار گاڑیوں نے حصہ لیا، جنہوں نے آلائشیں اٹھانے کے لیے 60 لاکھ کلومیٹر کا فاصلہ طے کیا۔
عظمیٰ بخاری نے کہا کہ وزیراعلیٰ پنجاب مریم نواز شریف نے خود اس آپریشن کی لمحہ بہ لمحہ مانیٹرنگ کی اور ہدایات جاری کیں۔ آپریشن کا دائرہ کار لاہور سے اٹک تک اور ملتان سے رحیم یار خان اور صادق آباد تک پھیلا ہوا تھا، جہاں بلا تفریق صفائی کا عمل یقینی بنایا گیا۔
انہوں نے مزید بتایا کہ شہریوں کو تعفن سے بچانے کے لیے حکومتی ٹیموں نے عرقِ گلاب، فینائل اور چونے کا بھرپور استعمال کیا، جبکہ صوبے بھر کی 4 ہزار سڑکوں کو عرقِ گلاب سے دھویا گیا۔ اس کے علاوہ ‘ستھرا پنجاب’ کے ورکرز نے 60 ہزار مساجد، امام بارگاہوں اور عید گاہوں میں بھی صفائی کے خصوصی انتظامات کیے۔
وزیر اطلاعات نے کہا کہ حکومتی ہیلپ لائن کو ملنے والی 100 فیصد شکایات کا فوری ازالہ کیا گیا۔ وزیراعلیٰ مریم نواز نے ‘ستھرا پنجاب’ کے ورکرز کی کارکردگی کو سراہتے ہوئے ان کے لیے 10، 10 ہزار روپے انعام کا اعلان بھی کیا ہے۔
آخر میں عظمیٰ بخاری نے ان شہریوں کا خصوصی شکریہ ادا کیا جنہوں نے ذمہ داری کا مظاہرہ کیا اور صفائی آپریشن میں حکومتی ٹیموں سے بھرپور تعاون کیا۔ انہوں نے کہا کہ صفائی آپریشن کی کامیابی پر پنجاب کے شہری بھی خوشی اور اطمینان کا اظہار کر رہے ہیں۔
عید الاضحیٰ پر پنجاب حکومت کا صفائی آپریشن کامیاب: 3 لاکھ 60 ہزار ٹن آلائشیں ٹھکانے لگائی گئیں، وزیر اطلاعات
