شیخوپورہ (رپورٹ اسامہ طفیل) گھریلو تنازع خونی تصادم میں بدل گیا، شوہر نے دوسری بیوی اور ساتھیوں کے ہمراہ پہلی بیوی کو مبینہ طور پر قتل کر دیا۔ افسوسناک واقعہ ساہو کی ملیاں کے علاقے میں پیش آیا پولیس کے مطابق مقتولہ کشور کی شادی اکیس سال قبل شفیق نامی شخص سے ہوئی تھی، جس سے اس کے دو بیٹے اور ایک بیٹی ہیں۔ مقتولہ کے بھائی محمد اظہر کی درخواست پر شوہر شفیق، دوسری بیوی ثمینہ اور بیٹے نبیل سمیت دیگر افراد کے خلاف مقدمہ درج کر لیا گیا ہے۔مدعی کے مطابق وہ عید ملنے اپنی بہن کے گھر گئے تو وہاں ملزمان مقتولہ پر تشدد کر رہے تھے، تشدد کے باعث کشور موقع پر ہی دم توڑ گئی۔ واقعہ کے بعد علاقے میں خوف و ہراس پھیل گیا جبکہ اہل خانہ غم سے نڈھال ہیں۔ہاوسنگ کالونی پولیس نے لاش کو پوسٹ مارٹم کے لیے مردہ خانے منتقل کر کے مزید کارروائی شروع کر دی جبکہ ملزمان کی گرفتاری کے لیے چھاپے مارے جا رہے ہیں۔
