تربت:(نامہ نگار کیچ)
تربت میں آل پارٹیز کیچ کا ایک اہم اجلاس کنوینر یونس جاوید کی سربراہی میں منعقد ہوا جس میں ضلع کیچ میں بڑھتی ہوئی بدامنی، چوری، ڈکیتی اور قتل و غارت کے واقعات پر گہری تشویش کا اظہار کیا گیا۔
اجلاس کے شرکا نے کہا کہ ضلع کیچ میں عوام کی جان و مال مکمل طور پر غیر محفوظ ہوچکی ہے جبکہ پولیس اور ضلعی انتظامیہ کی بے حسی نے جرائم پیشہ عناصر کو کھلی چھوٹ دے رکھی ہے، جس کے باعث شہری شدید خوف و ہراس کا شکار ہیں۔آل پارٹیز کیچ نے مطالبہ کیا کہ ضلع کیچ میں امن و امان کی بحالی کیلئے فوری، مؤثر اور عملی اقدامات کیے جائیں، جرائم پیشہ عناصر کے خلاف بلاامتیاز کارروائی عمل میں لائی جائے اور عوام کو فوری ریلیف فراہم کیا جائے۔اجلاس میں پاکستان پیپلز پارٹی کے رہنما نواب شمبے زئی، نیشنل پارٹی کے مرکزی رہنما محمد جان دشتی، کیچ بار کونسل کے صدر کہدہ عنایت دشتی، جماعت اسلامی کے رہنما غلام یاسین، پاکستان نیشنل پارٹی عوامی کے رہنما میران حیات اور مرکزی جمعیت اہل حدیث کیچ کے امیر مولانا سعید تگرانی سمیت مختلف سیاسی و سماجی شخصیات نے شرکت کی۔
۔