تہران :امریکہ اور ایران کے درمیان ثالثی کی کوششوں کے سلسلے میں وفاقی وزیر داخلہ محسن نقوی ایرانی حکام کے ساتھ بات چیت کے لیے بدھ کو تہران پہنچے۔
یہ بات ایران کی نیم سرکاری خبر رساں ایجنسی تسنیم نے بدھ کو بتائی۔محسن نقوی ایسے وقت میں دوبارہ تہران پہنچے ہیں جب پاسداران انقلاب نے بدھ کو خبردار کیا تھا کہ اگر امریکہ اور اسرائیل نے اس پر دوبارہ حملے شروع کیے تو مشرق وسطیٰ کی جنگ خطے سے باہر تک پھیل جائے گی۔
خیال رہے محسن نقوی تقریباً چار روز ایران میں گزار کر گذشتہ روز منگل کو ہی پاکستان پہنچے تھے، جہاں انھوں نے ایرانی صدر مسعود پزشکیان، ایرانی پارلیمنٹ کے سپیکر محمد باقر قالیباف اور وزیرِ خارجہ عباسی عراقچی سمیت متعدد ایرانی شخصیات سے ملاقاتیں کی تھیں۔
منگل کو ایران سے واپسی کے بعد محسن نقوی نے وزیرِ اعظم شہباز شریف اور فیلڈ مارشل عاصم منیر کو اپنے دورے سے متعلق آگاہ بھی کیا تھا۔
حکومتِ پاکستان کی جانب سے وزیرِ داخلہ کے دورے کی تفصیلات تو شیئر نہیں کی گئیں، لیکن یہ دورے ایک ایسے وقت میں سامنے آ رہے ہیں جب ایران اور امریکہ کے درمیان مستقل جنگ بندی اور مذاکرات کی بحالی کے لیے پاکستان کی ثالثی میں پیغامات کا تبادلہ کر رہے ہیں۔