کراچی :ڈی ایچ اے سٹی کراچی اور اے بی ایس ڈیولپرز کے درمیان پاکستان کی بلند ترین عمارت “برجِ قائد” کی تعمیر کیلئے باضابطہ معاہدہ طے پا گیا۔
منصوبے کے مطابق 82 منزلہ “برجِ قائد” 941 فٹ بلند ہوگی، جو پاکستان کی سب سے بلند عمارت کا اعزاز اپنے نام کرے گی۔ یہ شاندار منصوبہ ڈی ایچ اے سٹی کراچی میں تعمیر کیا جائے گا۔حکام کے مطابق جدید طرزِ تعمیر کا حامل “برجِ قائد” تقریباً 6 ایکڑ اراضی پر مشتمل ہوگا جبکہ منصوبے کی تکمیل کیلئے 6 سال کا ہدف مقرر کیا گیا ہے۔
سول ایوی ایشن اتھارٹی اور دیگر متعلقہ اداروں کی جانب سے منصوبے کیلئے 941 فٹ بلندی کا این او سی بھی جاری کر دیا گیا ہے۔اے بی ایس ڈیولپرز بین الاقوامی ماہرین اور کنسلٹنٹس کی نگرانی میں اس منصوبے پر کام کرے گا، جسے ملک میں جدید تعمیراتی ترقی کی اہم مثال قرار دیا جا رہا ہے۔ماہرین کے مطابق “برجِ قائد” کی تعمیر سے کراچی میں جدید شہری انفراسٹرکچر، سرمایہ کاری اور کاروباری سرگرمیوں کو مزید فروغ ملے گا جبکہ یہ منصوبہ پاکستان میں جدید ہائی رائز ڈیولپمنٹ کے نئے دور کے آغاز کی علامت بھی ثابت ہوگا۔