ٹرمپ کا نیتن یاہو کو فون،”وقت تیزی سے نکل رہا ہے، ایران جلد فیصلہ کرے ورنہ کچھ نہیں بچے گا”

    واشنگٹن/تل ابیب: امریکی صدر ڈونلڈ ٹرمپ نے ایران کو نیست و نابود کرنے کی ایک اور ہولناک دھمکی دیتے ہوئے کہا ہے کہ تہران کے پاس اب وقت ختم ہو رہا ہے اور اگر اس کے رہنماؤں نے فوری طور پر اپنے رویے میں تبدیلی نہ کی تو اس کے سنگین نتائج بھگتنا ہوں گے۔ اتوار کے روز اپنے سوشل میڈیا پلیٹ فارم ‘ٹروتھ سوشل’ پر ایک انتہائی جارحانہ پوسٹ شیئر کرتے ہوئے صدر ٹرمپ نے تہران کو شدید ترین انتباہ جاری کیا ہے۔
    ” امریکی صدر ڈونلڈ ٹرمپ نے اپنی پوسٹ میں لکھا:

    "ایران کے لیے الٹی گھڑی (Clock is Ticking) چلنا شروع ہو چکی ہے، اور ان کے لیے یہی بہتر ہے کہ وہ بہت تیزی سے اپنے اقدامات کریں (کسی معاہدے کی طرف بڑھیں)، ورنہ ان کا نام و نشان تک باقی نہیں بچے گا۔ وقت بہت اہم ہے اور تیزی سے نکلا جا رہا ہے!”


    صدر ٹرمپ کی اس دھمکی کو خطے میں جاری کشیدگی کے تناظر میں ایران کے خلاف کسی ممکنہ اور حتمی امریکی فوجی ایکشن کا واضح اشارہ سمجھا جا رہا ہے۔

    تہران پر بڑھتے ہوئے اس دباؤ کے درمیان اسرائیلی پبلک براڈکاسٹر ‘کان’ (Kan) نے ایک دھماکہ خیز انکشاف کیا ہے کہ اتوار کے روز ہی اسرائیلی وزیرِ اعظم بنجمن نیتن یاہو اور امریکی صدر ڈونلڈ ٹرمپ کے مابین ایک انتہائی اہم ٹیلیفونک رابطہ ہوا ہے۔دونوں عالمی رہنماؤں کے درمیان یہ گفتگو نصف گھنٹے سے زائد وقت تک جاری رہی۔اس طویل فون کال کے دوران ایران کے خلاف دوبارہ لڑائی شروع کرنے کے امکانات پر تفصیلی اور اسٹریٹجک تبادلہ خیال کیا گیا۔
    ایران میں جنگ کے امکانات کے علاوہ، صدر ٹرمپ نے اسرائیلی وزیرِ اعظم کو اپنے حالیہ دورۂ چین کے حوالے سے بھی اعتماد میں لیا۔
    سیاسی و عسکری ماہرین کا ماننا ہے کہ ایک طرف صدر ٹرمپ کی جانب سے ایران کو ‘ٹاکنگ کلاک’ کی دھمکی اور دوسری طرف نیتن یاہو کے ساتھ ان کی آدھے گھنٹے سے زائد طویل مشاورت اس بات کا ثبوت ہے کہ واشنگٹن اور تل ابیب مل کر ایران کے خلاف کسی بڑے اور ہلاکت خیز آپریشن کا خاکہ تیار کر چکے ہیں۔ اگر ایران نے فوری طور پر امریکی شرائط کے سامنے سر تسلیم خم نہ کیا تو مشرقِ وسطیٰ ایک مرتبہ پھر کسی بڑی تباہ کن جنگ کی لپیٹ میں آ سکتا ہے۔

    Related Posts