رپورٹ : جلیل نقوی
چکوال کی مٹی ایک بار پھر سرخرو ہو گئی، جب بھبھڑ سے تعلق رکھنے والے ایک بٹ خاندان کے نوجوان نے اپنی جان کی پرواہ کیے بغیر انسانیت کو بچانے کا فرض ادا کیا۔
بیورو چیف جلیل نقوی کی رپورٹ کے مطابق راولپنڈی کے علاقے بحریہ ٹاؤن فیز 7 میں ایک فوڈ ڈیلیوری رائیڈر اپنی ڈیوٹی انجام دیتے ہوئے گزر رہا تھا کہ اچانک اس کے کانوں میں ایک معصوم بچی کی دل دہلا دینے والی چیخیں گونجیں۔ رات کی خاموشی میں یہ آواز کسی خطرے کی گھنٹی سے کم نہ تھی۔
رائیڈر نے بغیر کسی ہچکچاہٹ کے اپنی موٹر سائیکل روکی اور آواز کی سمت بڑھا تو دیکھا کہ دو اوباش نوجوان ایک کمسن بچی کو اپنی درندگی کا نشانہ بنانے کی کوشش کر رہے تھے۔ صورتحال نہایت خطرناک تھی کیونکہ ملزمان کے پاس اسلحہ بھی موجود تھا۔لیکن چکوال کے سپوت نے ہمت نہ ہاری۔
بھبھڑ کے رہائشی بشارت علی بٹ نے نہ صرف موقع پر ڈٹ کر مقابلہ کیا بلکہ بلند آواز میں شور مچانا شروع کر دیا۔ اس کی آواز نے علاقے میں سنسنی پھیلا دی اور چند ہی لمحوں میں لوگ موقع پر جمع ہونا شروع ہو گئے۔ مجرم، جو خود کو طاقتور سمجھ رہے تھے، عوام کا ہجوم دیکھ کر گھبرا گئے۔
علاقہ مکینوں نے فوری طور پر بچی کو ان کے چنگل سے آزاد کروایا جبکہ اطلاع ملنے پر پولیس بھی موقع پر پہنچ گئی اور دونوں ملزمان کو گرفتار کر لیا گیا۔
یہ واقعہ صرف ایک بچی کی زندگی بچانے کی کہانی نہیں، بلکہ یہ اس بات کا ثبوت ہے کہ چکوال کے بیٹے آج بھی غیرت، جرات اور انسانیت کی پہچان ہیں۔
کچھ لوگ وردی کے بغیر بھی قوم کے اصل محافظ ہوتے ہیں… اور بشارت علی بٹ انہی میں سے ایک ہے۔
