میر ولی محمد، ڈگو فارم ماندل اور آھوری فارم سمیت دور دراز علاقوں سے آنے والی بچیوں کو پروگرام میں ترجیح دی گئی
عمرکوٹ رپورٹ بیوروچیف ڈاکٹر ایم لال واگھانی
عمرکوٹ میں پی پی اے ایف اور پی ٹی سی ایل کے اشتراک سے ’’بااختیار وومین‘‘ پروگرام کے تحت سلائی اور ڈیجیٹل مارکیٹنگ کی تربیت مکمل کرنے والی 33 طالبات کے اعزاز میں تقریب منعقد کی گئی، جس میں طالبات میں سرٹیفکیٹس اور موبائل فون تقسیم کیے گئے۔
تفصیلات کے مطابق
ایک ماہ پر مشتمل تربیتی پروگرام کے دوران طالبات کو سلائی اور ٹیلرنگ کی عملی تربیت فراہم کی گئی، جبکہ اپنے ہنر کو جدید تقاضوں سے ہم آہنگ کرنے کے لیے تین روزہ ڈیجیٹل مارکیٹنگ اسکلز کورس بھی کروایا گیا۔ پروگرام کا مقصد خواتین کو اپنے ہنر اور مصنوعات کو سوشل میڈیا اور دیگر آن لائن پلیٹ فارمز کے ذریعے متعارف کرانے کے قابل بنانا ہے۔تقریب میں رائٹ سلوشن سینٹر کے اونر راجیش کمار، ریپیڈ این جی او کے ڈسٹرکٹ مینیجر قیصر احمد خان، آئی آر ایم کے بختیار، میڈم مینا کماری سمیت دیگر معززین نے شرکت کی۔تقریب سے خطاب کرتے ہوئے ریپیڈ این جی او کے ڈسٹرکٹ مینیجر قیصر احمد خان نے کہا کہ ان کی خواہش تھی کہ عمرکوٹ کے دور دراز علاقوں کی بچیوں کو بھی ایسی عملی اور جدید مہارتوں سے آراستہ کیا جائے جو انہیں معاشی طور پر خودمختار بنانے میں مددگار ثابت ہوں۔ میر ولی محمد، ڈگو فارم ماندل اور آھوری فارم سمیت دور دراز علاقوں سے آنے والی بچیوں کو پروگرام میں ترجیح دی گئی۔قیصر احمد خان کا کہنا تھا کہ آج کے دور میں صرف ہنر سیکھنا کافی نہیں، بلکہ اس ہنر کو ڈیجیٹل ذرائع کے ذریعے لوگوں تک پہنچانا بھی ضروری ہے، اسی لیے طالبات کو سلائی اور ٹیلرنگ کے ساتھ ڈیجیٹل مارکیٹنگ کی تربیت دی گئی۔یوفون کی جانب سے طالبات کو موبائل فون، مفت سم اور ایک سال کے لیے مفت ڈیٹا بھی فراہم کیا گیا، تاکہ وہ حاصل کردہ ڈیجیٹل مہارتوں کو عملی طور پر بروئے کار لاتے ہوئے اپنے ہنر اور مصنوعات کو آن لائن فروغ دے سکیں۔تقریب کے اختتام پر طالبات نے پروگرام کے منتظمین اور معاون اداروں کا شکریہ ادا کرتے ہوئے کہا کہ سلائی، ٹیلرنگ اور ڈیجیٹل مارکیٹنگ کی تربیت انہیں عملی زندگی میں آگے بڑھنے اور باعزت روزگار کے مواقع حاصل کرنے میں مدد دے گی۔