لاہور / ساہیوال:وزیراعلیٰ پنجاب مریم نواز شریف سے ساہیوال کے ارکانِ صوبائی اسمبلی نے ملاقات کی ہے، جس میں علاقے کے ترقیاتی امور اور فلاحی منصوبوں پر تفصیلی تبادلہ خیال کیا گیا۔ ملاقات کرنے والے وفد میں ولایت شاہ، قاسم ندیم، ارشد ملک، ندیم اسلم لودھی، رانا ریاض احمد اور محمد حنیف شامل تھے۔
ملاقات کے دوران وزیراعلیٰ مریم نواز نے ساہیوال کے عوام کے لیے ایک اور بڑا اعلان کرتے ہوئے وہاں جلد 14 مزید الیکٹروبسیں مہیا کرنے کا حکم دیا ہے۔ وزیراعلیٰ کا کہنا تھا کہ حکومت ترقیاتی منصوبوں کو اب بڑے شہروں سے نکال کر نچلی سطح یعنی گاؤں کے دیہات تک لے کر آ رہی ہے۔ انہوں نے ارکان اسمبلی کو ہدایت کی کہ وہ ساہیوال میں جاری ترقیاتی پراجیکٹس کے معیار اور شفافیت پر کڑی نظر رکھیں۔
ارکان اسمبلی نے ساہیوال شہر کی بیوٹیفکیشن کو شاندار اور تاریخی اقدام قرار دیتے ہوئے کہا کہ عارف والا بائی پاس، یوسف والا، نور شاہ، کے ایف سی بائی پاس، جنرل بس اسٹینڈ تا کمیر، اڈہ سبیل اور بالا موڑ کے روٹس پر چلنے والی الیکٹروبسیں پہلے ہی ہزاروں شہریوں کو سفر کی جدید سہولتیں فراہم کر رہی ہیں۔ انہوں نے ساہیوال ڈویژن کے لیے 10 جدید ترین ‘نواز شریف اسکولز آف ایمیننس’ کے قیام اور سیوریج و ڈرینج کے منصوبوں پر وزیراعلیٰ کا خصوصی شکریہ ادا کیا۔
اس موقع پر گفتگو کرتے ہوئے مریم نواز شریف نے عزم ظاہر کیا کہ ‘نواز شریف اسکولز آف ایمیننس’ کا معیار کسی بھی بڑے اور نامور پرائیویٹ اسکول سے کم نہیں ہوگا، جہاں غریب اور امیر طبقے کے بچوں کو زندگی میں ترقی کے یکساں مواقع میسر آئیں گے۔ ارکان اسمبلی نے اس بات پر اتفاق کیا کہ تاریخ میں پہلی بار عوام کے حقیقی مسائل کے حل پر اس قدر توجہ دی جا رہی ہے۔