بنیان المرصوص، مئی میں دشمن پاکستان کی طاقت،ہنرمندی دیکھ کر ششدر رہ گیا تھا، ائیر چیف مارشل ظہیر احمد بابر سدھو

راولپنڈی:ایئر چیف مارشل ظہیر احمد بابر سدھو نے کہا ہے کہ مئی میں دشمن پاکستان کی طاقت اور ہنرمندی دیکھ کر دنگ رہ گیا تھا۔
پاکستان ملٹری اکیڈمی کاکول میں پاسنگ آؤٹ پریڈ کی پروقار تقریب سے بطور مہمان خصوصی خطاب میں ایئرچیف مارشل ظہیر احمد بابر سدھو نے کہا کہ معرکہ حق اور بنیان المرصوص میں پاکستان آرمی کی حکمت عملی پوری دنیا نے دیکھی، پاکستان ایئر فورس نے نہ صرف دشمن کے جہاز گرائے بلکہ تاریخ رقم کی۔
انہوں نے کہا کہ سیاسی اور عسکری قیادت کی عالمی سطح پر امن کے قیام کیلئے کوششیں قابل ستائش ہیں، پاکستان پر امن ملک ہے جو عالمی سطح پر تنازعات کا حل مذاکرات کے ذریعے حل کرنے پر یقین رکھتا ہے۔
ایئر چیف مارشل نے کہا کہ پاکستان کیخلاف کسی بھی قسم کی جارحیت کا منہ توڑ جواب دیا جائے گا، پاکستان بھارت کے زیر قبضہ کشمیریوں کی حمایت جاری رکھے گا، کیڈٹس کی بنیادی ذمہ داری ملکی سلامتی کو یقینی بنانا ہے۔
آئی ایس پی آر کے مطابق پاک فضائیہ کے سربراہ نے پریڈ کا جائزہ لیا اور نمایاں کارکردگی کا مظاہرہ کرنیوالے کیڈٹس کو اعزازات سے نوازا، 153ویں پی ایم اے لانگ کورس کے اکیڈمی کے سینئر انڈر آفیسر بلال نسیم کو اعزازی شمشیر سے نوازا گیا، 153ویں پی ایم اے لانگ کورس کے بٹالین کے سینئر انڈر آفیسر محمد سعد موسیٰ کو صدارتی گولڈ میڈل اور 153ویں پی ایم اے لانگ کورس کے نیپال سے تعلق رکھنے والے دوست ملک کے سینئر انڈر آفیسر پوبن کنور کو چیف آف ڈیفنس فورسز اوورسیز گولڈ میڈل سے نوازا گیا۔
153 ویں پی ایم اے لانگ کورس کے جنٹلمین کیڈٹ مسعود الرحمان کو مارکس مین میڈل دیا گیا، چیف آف آرمی سٹاف اعزازی چھڑی 38ویں ٹیکنیکل گریجویٹ کورس کے انڈر آفیسر حیدر بن عابد نے حاصل کی، جبکہ 15ویں مجاہد کورس میں چیف آف آرمی اسٹاف چھڑی سارجنٹ پیر محمد عبداللہ شاہ کو دی گیئی، کمانڈنٹ کینز 72ویں انٹیگریٹڈ کورس کے کورس انڈر آفیسر علی بن وقار اور 27ویں لیڈی کیڈٹ کورس کی انڈر آفیسر والیہ زیب کو دی گئی۔