ایران امریکا مذاکرات، اسلام آباد قلعے میں تبدیل، جا بجا سرچ اینڈ کومبنگ آپریشنز،دوروزہ تعطیل ،متعدد سڑکیں شہریوں کیلئے بند

اسلام آباد:ایران اور امریکا کے درمیان ہونے والے امن مذاکرات کے تناظر میں دارالحکومت اسلام آباد اور راولپنڈی میں سیکیورٹی کے انتظامات انتہائی سخت کر دیے گئے ہیں۔
ایران اور امریکا کے وفود کی آمد کے پیش نظر اسلام آباد اور راولپنڈی ڈویژن کے پانچ اضلاع میں سرچ اینڈ کومبنگ آپریشنز کا آغاز کر دیا گیا ہے تاکہ امن و امان کی صورتحال کو یقینی بنایا جا سکے۔
قانون نافذ کرنے والے اداروں نے سبزی منڈی، فیض آباد، ترنول اور کراچی کمپنی سمیت مختلف حساس علاقوں میں کارروائیاں کی ہیں، جبکہ راولپنڈی کے علاقوں پیرودھائی، نور خان ایئر بیس اور حاجی کیمپ میں بھی سرچنگ کا عمل جاری ہے۔
اسلام آباد میں غیرملکی وفود کی آمد کے باعث خصوصی ٹریفک پلان نافذ کردیا گیا ہے۔ شہریوں کو ہدایت کی گئی ہے کہ وہ مخصوص راستے استعمال کریں تاکہ ٹریفک کے بہاؤ میں آسانی رہے۔
ٹریفک پولیس کے مطابق، جی ٹی روڈ پشاور سے راولپنڈی آنے والے افراد ٹیکسلا موٹروے، چکری چک بیلی روڈ، اور روات استعمال کریں، جبکہ لاہور سے پشاور جانے والے افراد روات، چک بیلی روڈ اور ٹیکسلا موٹروے کا رخ کریں۔
مارگلہ روڈ سے راولپنڈی جانے والے شہری نائنتھ ایونیو اور راولپنڈی سے اسلام آباد آنے والے مری روڈ کے ذریعے نائنتھ ایونیو استعمال کریں۔ فیصل ایونیو سے زیرو پوائنٹ جانے والی ٹریفک کو نائنتھ ایونیو کی طرف موڑ دیا جائے گا، جبکہ زیرو پوائنٹ سے کورال چوک تک ایکسپریس وے دونوں اطراف سے بند رہے گی۔
اضافی طور پر، آج اور کل اسلام آباد میں ہر قسم کی ہیوی ٹریفک کے داخلے پر پابندی عائد رہے گی۔
اسلام آباد کی ضلعی انتظامیہ نے دو دن کی مقامی چھٹی کا اعلان بھی کیا ہے۔ جمعرات 9 اور جمعہ 10 اپریل کو تمام سکول اور دفاتر بند رہیں گے، تاہم ضروری خدمات کے ادارے معمول کے مطابق کام کرتے رہیں گے۔