اسلام آباد:حکومت کی طرف سے 23 مارچ کو یومِ پاکستان کی پریڈ اور اس سے منسلک تمام تقریبات منسوخ کردی گئی ہیں، اس دن کو وقار اور احترام کے ساتھ سادہ پرچم کشائی کی تقریبات کے ذریعے منایا جائے گا۔ وزیراعظم آفس کے مطابق خطے میں جاری کشیدہ صورتحال کے باعث تیل بحران اور اس کے پیش نظر حکومت کے اعلان کردہ کفایت شعاری اقدامات کو مدنظر رکھتے ہوئے فیصلہ کیا گیا ہے کہ 23 مارچ 2026ء کو یومِ پاکستان کی پریڈ اور اس سے منسلک تمام تقریبات منعقد نہیں کی جائیں گی تاہم اس دن کو وقار اور احترام کے ساتھ سادہ پرچم کشائی کی تقریبات کے ذریعے منایا جائے گا۔
اعلامیہ میں کہا گیا ہے کہ یہ اقدام اس بات کو یقینی بنانے کے لیے کیا جا رہا ہے کہ قوم کی یومِ پاکستان کے نظریات سے وابستگی، استقامت اور غیر متزلزل عزم کے ساتھ ساتھ وسیع تر کفایت شعاری پالیسی کو بھی برقرار رکھا جائے، تمام وزارتوں، ڈویژنز اور محکموں کو ہدایت کی جاتی ہے کہ وہ اس موقع کو سادگی اور پر وقار طریقے سے منائیں تاکہ محدود تقریبات کے باوجود اس دن کی اہمیت اور اس کا حقیقی پیغام برقرار رکھا جا سکے۔
بتایا جارہا ہے کہ صدرِ مملکت آصف علی زرداری نے یومِ پاکستان پر پریڈ اور دیگر تمام متعلقہ تقریبات منعقد نہ کرنے کی سمری کی منظوری دے دی، ایوانِ صدر کی جانب سے جاری ہونے والی تفصیلات سے معلوم ہوا ہے کہ یہ فیصلہ خلیجی تیل کے بحران اور حکومتی کفایت شعاری کے اقدامات کے تناظر میں کیا گیا ہے، اس سلسلے میں صدرِ مملکت آصف زرداری نے یہ فیصلہ وزیرِ اعظم شہباز شریف کی ایڈوائس پر کیا، اس ضمن میں صدرِ مملکت آصف علی زرداری کا کہنا ہے کہ قومی وسائل کا محتاط اور ذمے دارانہ استعمال ہر شہری کی ذمے داری ہے۔
