پارٹی ورکرز ماتھے کا جھومر، ملک بھر میں بلدیاتی انتخابات ایک ہی وقت میں ہونے چاہئیں: حمزہ شہباز

لاہور : پاکستان مسلم لیگ (ن) کے نائب صدر اور سابق وزیراعلیٰ پنجاب حمزہ شہباز نے کہا ہے کہ پارٹی کے وفادار کارکن ہمارا اصل اثاثہ اور ماتھے کا جھومر ہیں۔
ن لیگ بیٹ رپورٹرز سے گفتگو کرتے ہوئے انہوں نے پارٹی ورکرز کی قربانیوں، ملکی معیشت اور بلدیاتی نظام کے حوالے سے اہم خیالات کا اظہار کیا۔

حمزہ شہباز نے کہا کہ مسلم لیگ ن کی قیادت نے جب بھی مشکل ترین دور دیکھا، ورکرز نے سیسہ پلائی دیوار بن کر ساتھ دیا۔ انہوں نے کہا کہ کارکنوں نے صعوبتیں برداشت کیں لیکن نظریے پر سمجھوتہ نہیں کیا۔ اپنی اور وزیراعظم شہباز شریف کی قید کا ذکر کرتے ہوئے انہوں نے کہا، "ہم نے جیل میں کٹھن وقت گزارا لیکن کبھی غلط بات تسلیم نہیں کی۔”
سابق وزیراعلیٰ نے ایک اہم آئینی تجویز پیش کرتے ہوئے کہا کہ قومی اسمبلی سے ایک ایسا بل پاس ہونا چاہیے جس کے تحت پورے ملک میں بلدیاتی انتخابات ایک ہی وقت میں منعقد کروائے جائیں۔ ان کا کہنا تھا کہ اختیارات کی نچلی سطح پر منتقلی سے ہی عوام کو حقیقی ریلیف مل سکتا ہے۔
ملکی معاشی صورتحال پر گفتگو کرتے ہوئے حمزہ شہباز نے کہا کہ جب ملک ڈیفالٹ ہونے کے دہانے پر تھا، تو ن لیگ کی مثبت پالیسیوں نے اسے بچایا۔ انہوں نے وزیراعظم شہباز شریف کی کوششوں کو سراہتے ہوئے کہا کہ اس وقت سب سے زیادہ توجہ ملکی معیشت کی بہتری پر ہے اور وزیراعظم اس مقصد کے لیے دن رات کوشاں ہیں۔
انہوں نے اعادہ کیا کہ ن لیگ کا منشور ہمیشہ عوام کی فلاح و بہبود رہا ہے اور ہم معاشی استحکام کے ذریعے عام آدمی کی زندگی میں آسانی لانے کے لیے پرعزم ہیں۔