اچھا چلتا ہوں دعاؤں میں یاد رکھنا ۔۔۔گلوکار اربجیت سنگھ نے گانا چھوڑ دیا

اچھا چلتا ہوں، دعاؤں میں یاد رکھنا
میرے ذکر کا زباں پہ سواد رکھنا۔۔۔
ممبئی :بالی وڈ کے معروف گلوکار اریجیت سنگھ نے اعلان کیا ہے کہ وہ اب سے ’بطور پلے بیک سنگر‘ کوئی نیا گانا نہیں گائیں گے۔
سوشل میڈیا پر ہزاروں افراد اریجیت کے گانوں کے گانے پوسٹ کرتے ہوئے انھیں خوبصورت الفاظ میں خراج تحسین پیش کر رہے ہیں۔
ایک صارف نے انھیں خراجِ تحسین پیش کرتے ہوئے لکھا ’اگر لیجنڈز ریٹائر ہو بھی جائیں، تو ان کی آوازیں کبھی ریٹائر نہیں ہوتیں۔‘
ایک اور صارف نے ایس حوالے سے لکھا ’وہ آواز جس نے نسلوں کو شکل دی، اب احترام کے ساتھ رخصت لے رہی ہے۔ موسیقی، یادوں اور جادو دکھانے کے لیے شکریہ۔ لیجنڈز کبھی ریٹائر نہیں ہوتے، وہ ہر اُس سُر میں ہمیشہ زندہ رہتے ہیں جو وہ ہمیں سنا گئے۔‘
مغربی بنگال کے مرشد آباد میں پیدا ہونے والے اریجیت سنگھ نے ہندی اور بنگالی کے علاوہ مراٹھی سمیت کئی دیگر انڈین زبانوں میں گانے گائے ہیں۔
ان کے بالی ووڈ گلوکاری کیرئیر کا آغاز 2011 میں فلم مرڈر ٹو سے ہوا۔ اس فلم کا ’دل سنبھل جا ذرا۔۔۔۔ پھر محبت کرنے چلا ہے تو‘ آج بھی انتہائی مقبول گانا ہے۔
ہم تیرے بن اب رہ نہیں سکتے
تیرے بنا کیا وجود میرا۔۔
عاشقی ٹو کا یہ گانا اریجیت کے سب سے پسندیدہ گانوں میں شمار ہوتا ہے۔
انھوں نے حال ہی میں ریلیز ہونے والی فلم بارڈر ٹو کے گانے ’گھر کب آؤ گئے‘ کو بھی اپنی آواز دی ہے، جس کا آج کل کافی چرچا ہے۔
انھوں نے وشال بھردواج کی ہدایت کاری میں بننے والی فلم ’او رومیو‘ کا گانا ’ہم تو تیرے ہی لیے تھے۔۔۔‘ بھی گایا ہے جو اگلے ماہ ریلیز ہونے جا رہی ہے۔
اریجیت سنگھ نے پلے بیک سنگنگ کیوں چھوڑی؟
گلوکار نے اپنی پوسٹ میں وضاحت کرتے ہوئے کہا کہ گلوکاری چھوڑنے کی کوئی ایک وجہ نہیں ہے۔ میں کافی عرصے سے گانا چھوڑنے کے بارے میں سوچ رہا تھا، آخر کار میں نے ہمت کر لی، پہلی وجہ یہ ہے کہ میں آسانی سے بور ہو جاتا ہوں، اس لیے میں مختلف جگہوں پر اسٹیج شوز کرتا رہتا ہوں۔ اب وہ بھی مجھے بور کرنے لگا ہے۔ مجھے کچھ مختلف قسم کی موسیقی کرنے کی ضرورت ہے تاکہ میں نئے نئے گانے گا سکوں۔” جو ابھر رہے ہیں ان سے سیکھوں گا اریجیت سنگھ نے اپنی ہی پوسٹ کے کمنٹ سیکشن میں پلے بیک سنگنگ چھوڑنے کی وجہ بتائی۔ اس نے واضح طور پر کہا کہ وہ اب تھک چکے ہیں۔