ملک بھر میں انٹر نیٹ صارفین کو مشکلات، آئی ایس پی کمپنی کی تکنیکی خرابی وجہ بنی یا کوئی اور؟

لاہور: ملک بھر میں انٹرنیٹ صارفین کو ایک بار پھر شدید مشکلات کا سامنا ہے، کیونکہ ایک اہم اپ اسٹریم پرووائیڈر کے عارضی بریک ڈاؤن کے باعث قومی سطح پر انٹرنیٹ سروس متاثر ہو گئی ہے
اس خرابی کے نتیجے میں مختلف شہروں میں انٹرنیٹ کی رفتار نمایاں طور پر کم ہو گئی، جبکہ آن لائن سرگرمیوں میں خلل پیدا ہو رہا ہے۔
اس بریک ڈاؤن نے متعدد انٹرنیٹ سروس فراہم کرنے والی کمپنیوں کو متاثر کیا، جس کے باعث صارفین کو ویب سائٹس کھولنے، ویڈیو اسٹریمنگ، آن لائن میٹنگز اور سوشل میڈیا استعمال کرنے میں مشکلات کا سامنا ہے، خاص طور پر آن لائن بینکنگ، ای کامرس اور ڈیجیٹل ادائیگیوں سے وابستہ افراد کو شدید پریشانی لاحق ہے۔
انٹرنیٹ سروس فراہم کرنے والی کمپنی نیا ٹیل نے اپنے آفیشل سوشل میڈیا اکاؤنٹ پر جاری بیان میں صورتحال کی وضاحت کرتے ہوئے کہا کہ ملک میں انٹرنیٹ کی مجموعی کارکردگی میں کمی اس لیے آئی ہے کیونکہ کمپنی کے دو اپ اسٹریم پرووائیڈرز میں سے ایک اس وقت غیر فعال ہے۔اس تکنیکی خرابی کے باعث پاکستان کے کئی شہروں میں انٹرنیٹ ٹریفک متاثر ہوئی اور صارفین کو کنیکٹیویٹی کے مسائل کا سامنا کرنا پڑ رہا ہے۔
نیا ٹیل کے مطابق کمپنی کی تکنیکی ٹیمیں صورتحال پر مسلسل نظر رکھے ہوئے ہیں اور متاثرہ اپ اسٹریم پرووائیڈر کے ساتھ قریبی رابطے میں کام کر رہی ہیں تاکہ مسئلہ جلد از جلد حل کیا جا سکے۔۔